Ende pa asnjë gjurmë. Dy policët që u zhdukën të shtunën mbrëma nuk po gjenden assesi.policet
Makina e tyre është gjetur po atë natë, por trupat e tyre jo. Kërkimet kanë nisur në Lepenc prej vendit ku u gjet makina. Sot është dita e katërt që këto kërkime po bëhen por pa rezultate.
Dy pjesëtaret e Policisë së Kosovës Malësor Dashi e Armend Trena u zhdukën pas aksidentit.
Të gjithë janë ngritur në këmbë për t’i kërkuar policët e zhdukur. Por prindërit e Armend Trenes nuk e dinë ende se çfarë ka ndodhur me djalin e tyre.
Ata, të shtyrë në moshë, jetojnë një fshat të thellë të Kaçanikut, larg informacioneve që flasin për zhdukjen dhe kërkimin e dy policëve.
Pjesa e familjes Trena që e dinë se çka ka ndodhur me djalin e tyre, kanë pritur njerëz.
Vendi ku janë aksidentuar Malësor Dashi e Armend Trena po kontrollohet për herë të dytë, por asnjë gjurmë nuk është gjetur.
Për të ndihmuar rreth operacionit kanë shkuar edhe ekipe nga Prishtina. Mes tyre edhe deputet të Kuvendit të Kosovës. Familjarët e policëve presin në ankth.
Kryemami i Kaçanikut i cili është edhe zhytës vullnetar, po lë fajtor një kompani private për vështirësitë e kërkimit.
Përkundër pengesave në kërkim vullneti për t’i gjetur është i madh.
Kush i pa per here te fundit
I fundit që ka kontaktuar me dy policët tashmë të zhdukur, është Bastri Thaçi nga Krivareka i cili qëndron në arrest shtëpiak, pasi që u përfshi në rrahjen masive në mes të punëtorëve të Bechtel Enkes.
Ai tregon se nuk kishte pasur asnjë problem me të dy policët që e shoqëruan nga Kaçaniku deri në Han të Elezit.
Madje, hedh poshtë të gjitha lajmet se të dy mund të ishin duke vozitur në gjendje të dehur.
Të gjitha informacionet ai thotë se i ka dhënë edhe për policinë, që e kanë intervistuar në mëngjesin e të dielës, por i njëjti do të intervistohet edhe nesër, për të njëjtin rast.
Kurse kryeprokurori i Prokurorisë Themelorë në Ferizaj, Shukri Jashari, ka thënë për T7, se nuk ka të dyshuar momentalisht, sepse rasti është i emërtuar si aksident.
Jashari deklaron se lidhur me rastin ende nuk është marrë askush në pyetje zyrtarisht. E sa për gjetjet ai ka një përgjigje.
