Nuk ka më asnjë dyshim se pas skenarëve destabilizues të opozitës fshihen rusët. Gazeta “SOT” ishte e para që e deklaroi diçka të tillë, ndërsa tani po dalin në drita fakte konkrete që tregojnë influencën ruse në radhët e PD dhe të LSI. Eurodeputeti Knut Fleckenstein dhe ish-nëndrejtori i FBI Mark Rossini kanë akuzuar drejtpërdrejt Berishën se ka lidhje me Moskën. Kreu i PE, Antonio Tajani po ashtu dha alarmin për depërtimin rus në Ballkan, ndërsa gazeta ka treguar se si mediat ruse i kanë bërë elozhe Ilir Metës dhe opozitës.
Por dje televizioni shtetëror rus “Russia Today” ka shuar çdo dyshim. Ai i ka kushtuar një rëndësi të veçantë protestës së opozitës, duke e transmetuar atë “LIVE” në rrjetet e saj sociale. Por, së pari kjo tregon se Rusia ka dërguar gazetarë të posaçëm për të ndjekur protestën dhe interesohet mbi atë se çfarë po bën opozita. Dhe e dyta, tregon se kemi një lojë ruse në mes, pasi deri më sot nuk ka ndodhur që një televizion ndërkombëtar të transmetojë drejtpërdrejt protestat në Shqipëri.
“Russia Today”, në protestën e javës që lamë pas i kushtoi një hapësirë të veçantë organizmit të PD e LSI, ndërsa dje i ka vënë kapak debatit. Ky televizion financohet nga qeveria ruse dhe jep një tjetër sinjal të qartë se rusëve u intereson destabilizimi dhe janë shumë të interesuar për atë se çfarë ndodh në vend. Po ashtu gazeta ka bërë një kërkim në internet dhe janë mbi dhjetra media online ruse që i kanë bërë jehonë protestës, duke përkrahur opozitën dhe duke vënë në pah sulmet ndaj qeverisë. Pothuajse të gjitha mediat nuk bëjnë një raportim korrekt, por gjithmonë anojnë krah PD-LSI.
Interesat ruse
Që më 16 shkurt, kur u bë protesta e parë e deri më sot, kanë dalë shumë fakte që tregojnë se kjo është lojë e qartë e rusëve. Gazeta e ka thënë se dy personat që deri më sot janë në influencën ruse janë Meta e Berisha, pasi kanë dalë kundër amerikanëve. Protesta drejtohet prej tyre dhe gjithë qëllimi është që vendi të hyjë në kaos. Çdokush mund të pyesë se çfarë fiton Moska? Përgjigjen e dha ish-nëndrejtori i FBI, Mark Rossini. Sipas tij, Shqipëria është vend shumë strategjik dhe në qershor pritet hapja e negociatave. Por Rusia ka kërkuar gjithmonë që përmes Serbisë të gjejë dalje në Adriatik. Hyrja e Shqipërisë në BE ja prish atij këtë plan. Po ashtu, dihet që Shqipëria ka influenca të mëdha në Maqedoni, Mal të Zi e Kosovë. Përmes kaosit bllokohen negociatat dhe po ashtu, nëse në vendin tonë instalohet një qeveri pro ruse, atëherë ndikimi i Moskës shtrihet dhe te fqinjët. Deri më tani të gjitha rrugët tregojnë se Berisha, Meta bashkë me Kryemadhin e Bashën po ndjekin skenarët destabilizues të Moskës.
SHBA dosje për Bashën
Për lidhjet e opozitës me rusët ka folur dje dhe kreu i grupit parlamentar socialist, Taulant Balla. Në një studio televizive edhe ai ka thënë se PD e LSI ndihmohen nga Moska. “Prej 16 shkurtit transmetohet direkt nga protesta apo selia e PD për televizionin shtetëror rus, nuk di se sa rëndësi paska për qeverinë ruse zyrtare, median zyrtare ruse, protesta e opozitës në Shqipëri. Ka pasur një akuzë, unë kam qenë i drejtpërdrejtë asokohe, në emër të PS-së, për një skenë financimi të dyshimtë me shumë para 650 mijë dollarë, në interes të Bashës, në dëm të Shqipërisë. Një akuzë që sot është në hetim, dhe për shkak se është në hetim kam mbyllur gojën për të pritur rezultatet e hetimit”, tha Balla.
Ai më tej u shpreh se së fundmi kanë mbërritur prova konkrete që e faktojnë këtë gjë. Prokuroria ka hapur një hetim penal për lobimet e PD në SHBA, pasi në dritë kanë dalë fakte se shpenzimet e lobimit janë mbuluar nga kompani ruse. “Sot nëpër Evropë mund të ketë pasur protesta me shumë më shumë pjesëmarrje, që media ruse të transmetonte protestën me 1500 vetë të opozitës. Për këtë çështje kanë ardhur dy letër porosi në Prokurori, nga SHBA dhe Skocia. Po presim nga prokuroria letër porositë për ndikimin rus, financimin rus të Bashës në vitin 2017, jam i sigurt që letërporositë kanë ardhur. Por nuk po flasim sepse kur heton prokuroria politika hesht”, tha Balla. Ditët e fundit shumë eksponentë ndërkombëtarë kanë dhënë alarmin se Ballkani rrezikon destabilizimin përmes ndikimit rus dhe faktet që dhe në vendin tonë influenca e Moskës dominon, po shtohen./Kliti Topalli
