Muli, me dhimbje dhe emocione të thella, përcolli sot zonjën Karo drejt Anglisë.
Ajo do të drejtojë prej andej një takim të rëndësishëm me emigrantët, ku do të flasë në lidhje të drejtpërdrejtë për Doktorin.
“Më vjen shumë keq që nuk mund të jem vetë më 17 nëntor mes kuksianëve të mi në Londër,” tha Muli, duke shtuar se “regjimi i Sorosit dhe mafia ndërkombëtare më kanë shpallur non grata në Angli.
Për këtë arsye, misioni yt është dyfish më i rëndësishëm.
Ti përfaqëson jo vetëm Doktorin, por edhe mua dhe demokratët e tjerë që nuk lejohen të hyjnë në Angli për shkak të Doktorit.”
Zonja Karo, e emocionuar, u shpreh:
“Të jeni të sigurtë se do t’ju nderoj.
Do të jem aty për të gjithë ju.
Jam e lumtur që edhe presidenti Trump ka marrë shembull nga Doktori duke zgjedhur një zëdhënëse të re dhe të bukur si Karoline Leavitt.
Deri tani, ishim mësuar me zëdhënëse të moshura apo burra.
Për herë të parë, Trump mëson prej Doktorit dhe zgjedh një vajzë të re dhe të hijshme.”
“Kjo e bën edhe më të madhe perspektivën tënde dhe të PD-së në tërësi,” tha Muli.
“Edhe Trumpi ka çfarë mëson nga ne, ashtu si ne kemi çfarë mësojmë prej tij.
Sa të hyjë në Shtëpinë e Bardhë, do t’i dërgojmë një delegacion që t’i tregojmë çfarë duhet të bëjë në 100 ditët e para për të ringritur demokracinë në Shqipëri.
Kurse në Londër, s’kemi ç’të bëjmë, sepse atje kanë fituar të Sorosit, edhe pse mua dhe Doktorin na shpallën non grata këta të djathtët e korruptuar.”
Zonja Karo përmbylli bisedën me një premtim:
“Rrini të qetë. Më 17 nëntor, komunistët do festojnë këtu çlirimin e Tiranës, kurse ne do të festojmë çlirimin e Londrës nga Sorosi!”
