Sapo Edi Rama njoftoi se qeveria do të mbyllë për një vit TikTok-un në Shqipëri, Muli thirri me urgjencë Lelon për ta pyetur çfarë ishte ky TikTok.
•Është një aplikacion si këto Facebook-u, Instagram-i etj. – tha Lelo.
•Me ne është apo kundër nesh? Se për shembull, Twitter-i tani është me ne; më parë ka qenë me Sorosin. Vetë Facebook-u është ende me Sorosin.
•S’di ç’të them – tha Lelo. – Po, i Kinës është. Domethënë, nga një vend komunist vjen.
•Po si ka mundësi që e mbyll ky Rama se ky është vetë komunist? – tha Muli.
•Ka shumë pikëpyetje – tha Lelo. – Disa thonë që e bën nga inati i Fevzos, se ai ka shumë ndjekës në TikTok. Ja ka kërkuar Sandri si nder; i ka thënë mbylle TikTok-un se ja ka varë fare emisionit. Dhe ai po e mbyll.
Të tjerë thonë që e mbyll se ka frikë nga Karmina, se është e famshme në TikTok. Disa thonë që këto influencueset që reklamojnë gjëra në TikTok janë shoqe të Karminës dhe janë me PD.
Por unë mendoj se ai ka dështuar personalisht në TikTok dhe nuk ka sukses, ndaj e mbyll.
•Unë e kam ditur shqiptar këtë aplikacion – tha Muli. – Se TikTok, shqip, i themi sahatit të orës. Mbaj mend që kështu nisnin deklaratat për shtyp dhe Raimonda Bulku kur ishte në PD, dhe e nxirrnim për t’i numëruar orët e humbjes Edi Ramës. Por, ngaqë ai fitoi pastaj, e kishte bezdi kur dëgjonte TikTok dhe e kam parë kurë. Kam menduar se ka qenë i yni.
•Jo, jo, tha Lelo. Sidoqoftë, duhet të reagojmë që të mos mbyllet, se Rama me siguri di ndonjë gjë që e ka në interes që do ta mbyllë.
•Patjetër – tha Muli. – Të hënën në protestë të shtohet një parrullë për TikTok-un:
“Edi Rama frikacak,
ta bën zemra TikTak.”
Të pëlqen?
•Mirë, po quhet TikTok.
•Po mirë, e ndryshojmë.
“Sa të jemi gjallë mbi tokë,
do na shohësh në TikTok.”
•Kjo më e mirë – tha Lelo. – Duhet ta shpërndajmë, se fitojmë shumë pikë me këtë.
