Gjithmonë kur nis sezoni turistik veror, fillon një fushatë e koordinuar për të nxirë bregdetin shqiptar, keq e më keq!
Dikur që në mëngjes mediat na bombardonin me kryetituj terrorizues “vritet”, “dhunohet”, “shpërthen bombola”…etj.
Kur sot turizmi shqiptar çdo ditë me hapa galopant po rrit standartet, lufta hibride tani kapet te çmimet, duke na servuar përralla të ndryshme!
Jo shtrenjtë, jo shezlloni, jo hoteli kështu ashtu, kapen për një fije kashte…
Isha në Sarandë dhe Ksamil, gjithë riviera e mbushur me turistë gjithandej, nga skajet e ndryshme të botës, por edhe nga trevat tona. Kisha rastin të flas me turistë të vendeve të ndryshme, që me plotë bindje dëshmonin se bregdeti shqiptar është bukuri e rrallë dhe shumë më i lirë se Greqia, Mali i Zi, Kroacia, Italia, Spanja. Në raport me këto të fundit mbi 60 % më lirë.
Në Shqipëri ka turizëm edhe për ata që me pak lekë mund ta shijojnë detin me kushte deri diku të kënaqshme, me kafenë e mëngjesit 1 euro, që s’mund ta shijosh as në sheshet e Prishtinës e sidomos Shkupit, me pijet me çmimet thuajse normale në një zonë turistike, shtëpi apo apartamente me dhoma nga 20, 25 euro e më lartë, por sigurisht se është edhe oferta tjetër për një turizëm luksi me kushte superstandarte.
Risi sivjet janë edhe plazhet publike, që mund ti kërkosh në çdo zonë turistike dhe s’paguan asgjë. Sigurisht duhet ta bartësh një çadër me vete ashtu si disa që të njejtën gjë e bëjnë në Greqi apo Mal të Zi.
Pra Shqipëria të ofron të gjitha mundësitë, varësisht sa e ki xhepin dhe sa dëshiron të harxhosh.
Propaganda e ditëve të fundit shihet qartë se është e sponsorizuar, por siç thonë kjo nuk i bën përshtypje askujt meqë jemi mësuar çdo ditë e më tepër të shijojmë dhe zbulojmë bukuri të rralla dhe të papara të bregdetit tonë!
Një fjalë e urtë popullore thotë: Qentë lehin, karvani ecën!
