sh-kryeministri grek Kostas Simitis, ndërroi jetë në moshën 88-vjeçare, orët e para të të mëngjesit të së dielës, 5 janar 2025. Sipas drejtorit të spitalit të Korinthit, Grigoris Karpouzis, Simitis u transportua nga vila e tij në Agii Theodori drejt spitalit rreth orës 07:30, pa puls. Vdekja e tij u konfirmua pas mbërritjes në spital, ndërsa mediat greke shkruajnë se pësoi atak kardiak.
Kush ishte Kostas Simitis
Kostas Simitis, profesor universiteti dhe politikan, ishte një nga figurat më të shquara të skenës politike bashkëkohore greke. Ai shërbeu si kryetar i PASOK-ut (30 qershor 1996 – 8 shkurt 2004) dhe kryeministër i Greqisë (18 janar 1996 – 10 mars 2004), duke lënë gjurmë në një epokë reformash të rëndësishme.
LEXO EDHE:
Greqi/ Arratisja e 2 shqiptarëve nga burgu i Kassavetias, policia ‘në këmbë’ për kapjen e tyre! Media: Janë parë nga qytetarët
Pas rënies së diktaturës më 1974, Simitis ishte një nga anëtarët themelues të PASOK. Gjatë karrierës së tij politike, ai mbajti shumë poste ministrore, duke kontribuar në konsolidimin e partisë në pushtet.
Karriera e tij arriti kulmin më 18 janar 1996, kur pasoi Andreas Papandreun si kryeministër, pas një votimi të Grupit Parlamentar të PASOK-ut. Duke përfaqësuar polin modernizues, ai u përqendrua në reformat ekonomike dhe konvergjencën evropiane të Greqisë. Pak më vonë, më 30 qershor 1996, u zgjodh kryetar i PASOK-ut në Kongresin e 4-të të partisë.
Gjatë mandatit të tij, Simitis promovoi masa për stabilitetin ekonomik dhe një politikë të jashtme të moderuar. Privatizimi gradual i sektorit publik dhe anëtarësimi i Greqisë në Bashkimin Ekonomik dhe Monetar në vitin 2001 ishin dy nga arritjet më të rëndësishme të tij.
Mandati i tij i dytë u karakterizua nga masa shtrënguese për uljen e inflacionit dhe borxhit kombëtar, si dhe nga përpjekjet për zgjidhjen e mosmarrëveshjeve me Turqinë dhe çështjes qipriote. Si kryetar i PASOK-ut, Simitis i kushtoi rëndësi integrimit evropian dhe përshtatjes së Greqisë me sfidat e globalizimit. Radikalizimi i diskursit politik të partisë u lidh me përpjekjet për harmonizimin e vendit me standardet e Bashkimit Evropian.
Pavarësisht kundërshtimeve që shkaktuan politikat e tij, Kostas Simitis njihet për kontributin e tij të rëndësishëm në formësimin e Greqisë moderne.
