Ndërkombëtarëve u është sosur durimi me stepjen e drejtësisë përballë politikanëve të korruptuar. SPAK po bën afro një vit që është ngritur dhe ende sot nuk ka asnjë hetim për një pushtetar të lartë.
Dikur ambasadorët e BE dhe SHBA flisnin për peshq të mëdhenj dhe arrestime VIP, por deklaratat u zbehën me shpresën se drejtësia e re do e ndryshojë situatën. Por duke qenë se politikanët po vijojnë të flenë të qetë, ambasadorët janë vënë në lëvizje duke nxitur SPAK dhe organet e tjera që tashmë fokusin ta kenë te zyrtarët e lartë.
Dje u mbajt tryeza “Forcimi i integritetit dhe lufta kundër korrupsionit: Arritjet më të fundit” dhe ambasadorja amerikane Yuri Kim doli me disa mesazhe të forta. Sipas saj korrupsioni nuk ka më vend në Shqipëri dhe duhet të luftohet në të gjitha nivelet.
“Qeveritë mund të kufizojnë mundësitë për korrupsion dhe mund të dënojnë ata që përdorin zyrën publike për të pasuruar veten ose partinë e tyre, ose që rrezikojnë bashkëqytetarët e tyre. Sigurisht, policia, prokurorët dhe gjyqtarët e pavarur që janë të autorizuar të ndjekin korrupsionin kudo që e gjejnë – pavarësisht nga interesat politike – janë thelbësore për një qeverisje të mirë.
Shqipëria duhet të fillojë vlerësimet e rregullta e periodike të performancës profesionale dhe etike të gjyqtarëve dhe prokurorëve për të siguruar një administrim të drejtë dhe efektiv të drejtësisë. Me pak fjalë, gjithmonë do të ketë aktorë të këqij. Qeveritë duhet të krijojnë mënyra për t’i gjetur dhe dënuar në mënyrë që të sigurohen që të gjithë janë të barabartë dhe trajtohen me drejtësi”, tha ajo. Sipas saj, Shqipëria po e fillon këtë rrugë dhe reforma në drejtësi ka filluar të tregojë rezultate.
Ambasadorja u shpreh se SHBA do mbështesë organet e reja, ndërsa u tregu optimiste për SPAK e BKH. “Në Mars ju morët një dritë jeshile nga BE. SPAK ka drejtorin e parë të NBI. Dhe së fundmi, GRECO tregoi përparim në luftën e Shqipërisë kundër korrupsionit. Nëse Shqipëria vazhdon këtë rrugë, ajo mund të bëhet një model i reformave të qeverisjes së mirë në vazhdim – reformat që ne kemi mbështetur dhe që do të vazhdojmë të mbështesim. Ne në Ambasadën e SHBA, përmes programeve tona në sektorin e drejtësisë, kemi bërë kompletimin e SPAK përparësinë tonë më të lartë, me investime të konsiderueshme në këshillimin e ekspertëve dhe mbështetje për pajisje”, tha ajo.
Apeli i BE
Akoma dhe më i drejtpërdrejtë ishte mesazhi i ambasadorit të BE, Luigi Soreca. Brukseli e ka vënë kush testimin e të korruptuarve dhe për ambasadorin tashmë steka duhet të ngrihet në nivele pushtetarësh.
“Gjendja e përgjithshme është që korrupsioni mbetet i përhapur në Shqipëri dhe është ende një shqetësim serioz për BE-në dhe Shtetet tona Anëtare. Ai kërkon përpjekje të mëtejshme të strukturuara dhe të qëndrueshme. Dënimet përfundimtare në rastet që përfshijnë zyrtarë të nivelit të lartë mbeten shumë të ulëta. Kjo është diçka që fatkeqësisht e kemi vlerësuar në të gjitha raportet tona të mëparshme.
Siç kemi parë në një numër vendesh të tjera – përfshirë edhe në Bashkimin Europian – keni nevojë për këto dënime të nivelit të lartë që shoqëria të kuptojë se askush nuk është mbi ligjin”, tha ai. Ambasadori pati një mesazh dhe për SPAK. Sipas tij duhen hetime e gjykime për zyrtarët e lartë. “Për këtë, ne shpresojmë shumë se SPAK dhe Gjykatat SPAK do ta forcojnë ndjeshëm kapacitetin për të hetuar, ndjekur penalisht dhe nxjerrë dënime përfundimtare në rastet e korrupsionit.
Është premtuese, për shembull, që kanë nisur hetimet kundër 23 magjistratëve të shkualifikuar nga vetingu, përfshirë 9 nga Gjykata Kushtetuese dhe Gjykata e Lartë”, tha ai. Pra ndërkombëtarët duket se janë në një linjë dhe shpresat janë që me Byronë e Hetimit situata do të ndryshojë./Kliti Topalli
