Policia ka nisur sot një aksion në mbështetje të IKMT për prishjen e ndërtimeve pa leje brenda rezidencave luksoze në Tiranë.
Shtesat pa leje dhe dalja jashtë kufijve të pronës është konstatuar në dhjetëra raste dhe po ndërhyet për prishjen dhe procedimin penal ndaj shkelësve të ligjit.
Në këtë zonë rezidenciale banojnë shumë biznesmenë dhe figura të njohura publike të medias dhe jetës politike ne vend.
Për këtë operacion të policisë ka reaguar me një status në profilin e tij në Instagram dhe Ministri i Brendshëm Taulant Balla:
“🇦🇱Policia e Shtetit dhe Inspektoriati Kombëtar i Mbrojtjes së Territorit po angazhohen çdo ditë për dhënien fund të ndërtimeve, shtesave pa leje dhe cdo shfaqje tjeter abuzive, pa asnjë dallim se ku ndodhet apo kush e zotëron.
Të gjithë duhet të japin llogari para ligjit dhe askush nuk mund të shpërfillë me arrogancë komunitetet, duke ndërtuar pa leje.
Na duhet një angazhim edhe më i madh i të gjitha bashkive dhe agjencive për identifikimin, penalizimin, shembjen apo konfiskimin për interes publik të të gjitha sipërfaqeve në pallate, qendra biznesi, hotele të ndërtuara në shkelje të ligjit.
Të gjitha katet e konfiskuara do të shkojnë për strehim social apo për mjedise pune për institucionet publike.”, shkruan ministri.
