Ishte padyshim një sfidë spektakolare, pavarësisht se nuk pati asnjë gol të shënuar, të paktën të rregullt. “Tulipanët” e Holandës nuk shkuan më shumë se barazimi përballë “Gjelave”, të Francës, në “Red Bull Arena”, të Lajpcigut, në sfidën e vlefshme për xhiron e dytë të fazës së grupeve, të Kampionatit Evropian të futbollit, Euro 2024.
Pavarësisht se loja pa një dominim total të francezë, topi në rrjetë kaloi vetëm në minutën e 69’-të, me “fantazistin”, Xavi Simons, i cili tundi rrjetën e “gardianit” të Milan, Mike Maignan, mirëpo një pozicion i parregullt, i një prej holandezëve, gjatë ndërtimit të aksionit bëri që rezultati të mbeste i pandryshuar deri në fundin e sfidës.
Falë këtij rezultati, Holanda ngjitet në vendin e parë të grupit D, me 4 pikë, po aq sa “Gjelat” francezë të vendit të dytë, por me një golavarazh më pozitiv se këta të fundit. Ndërkaq, në sfidën e fundit të fazës së grupeve, Holanda do të përballet me Austrinë, ndërsa francezët e Deschamps do të ndeshen me Poloninë.
