Gjermania është investitori më i madh i huaj në Serbi, ka thënë presidenti serb, Aleksandër Vuçiç, derisa kancelari gjerman, Olaf Scholz, është treguar më konkret, duke folur për numrin e saktë të vendeve të punës që i kanë hapur kompanitë gjermane në Serbi.
“Ne jemi të lumtur që marrëdhëniet tona ekonomike po vazhdojnë mirë. Kemi më shumë se 75 mijë vende pune në Serbi nga kompanitë gjermane. Shpresoj se do të vazhdojë të rritet ky numër”, deklaroi Scholz në konferencë të përbashkët për media me presidentin serb në Beograd.
Scholz, pasi e ka kryer pjesën e fjalimit për ekonominë, ka folur për sanksionet që patjetër duhet Serbia t’ia vendosë Rusisë.
“Lufta në Ukrainë është një luftë e tmerrshme dhe pakuptimtë. Kjo është arsyeja pse është e rëndësishme të ndihmojmë Ukrainën të mbrohet nga sulmet. Një pjesë e asaj që kemi bërë, është vendosja e sanksioneve. Kjo është arsyeja pse është e rëndësishme që, sa më shumë vende të jetë e mundur, të vendosin sanksione shtesë. Në këtë mënyrë, Ukraina mund të mbrojë veten”.
“Ne presim që të gjitha vendet kandidate për në BE t’u bashkohen sanksioneve kundër Rusisë,” tha Scholz.
Ai ka treguar se temë me Vuçiç ishte edhe dialogu për normalizimin e marrëdhënieve ndërmjet Serbisë dhe Kosovës.
Scholz tha se ai u bëri thirrje udhëheqësve të bëjnë përparim dhe të përmirësojnë dialogun.
