Mbi 10.5 milionë medikamente mjekësore me vlerë mbi 40 milionë euro, 349 të dyshuar të arrestuar dhe 10 laboratorë klandestine, janë rezultatet e një operacioni të Europol në 28 vende të botës, mes tyre dhe Shqipëria, gjatë të cilit u shkatërruan 59 grupe kriminale të trafikimit e ilaçeve të falsifikuara dhe substancave doping.
Policia shqiptare njoftoi se nga 7 operacionet të zhvilluara në vendin tonë, 14 janë në pranga, 6 nën hetim si dhe janë sekuestruar medikamente me vlerë 100 mijë euro. Gjatë operacionit ndërkombëtar ‘Shield’, u sekuestruan sasi masive të barnave të keqpërdorura, të falsifikuara, medikamente dhe substanca dopingu dhe suplemente të paligjshme ushqimore dhe sportive, si dhe vaksina të falsifikuara kundër Covid, produkte sanitare dhe pajisje mjekësore. Substancat doping dhe ilaçet për mosfunksionimin erektil ishin ndër sendet më të sekuestruara. Po ashtu u sekuestruan mbi 1 milion teste të falsifikuara për COVID.
Hetimet
Operacioni u drejtua nga Franca, Greqia, Italia dhe Spanja. Mbi 195 hetime u zhvilluan midis prillit dhe tetorit të vitit 2022. Janë monitoruar mbi 588 faqe interneti, nga të cilat u mbyllën 89. Mbi 218 mijë dërgesa janë kontrolluar ndërsa mbi 74 mijë janë sekuestruar.
Anëtarët e grupit kriminal që merreshin me trafik ilaçesh, kryesisht të mosfunksionimit erektil ishin aktivë në Greqi dhe mbanin qendra të tjera të vogla në Evropë, SHBA dhe Azi. Dy laboratorë që u zbuluan në Greqi bënin të mundur përpunimin e lëndës së parë të trafikuar përmes Moldavisë dhe Bullgarisë në produkte të ndryshme. Shitjet u kryen përmes faqeve të internetit dhe adresave të e-mail të koduara për një klientelë ndërkombëtare, duke përfshirë dhjetëra atletë profesionistë.
Grupet kriminale shfrytëzuan mundësitë e ofruara nga pandemia Covid-19 për të shitur vaksina të falsifikuara. Shtetet anëtare që u përfshinë në operacion ishin Austria, Belgjika, Bullgaria, Kroacia, Qiproja, Finlanda, Franca, Gjermania, Greqia, Hungaria, Irlanda, Italia, Lituania, Holanda, Polonia, Portugalia, Rumania, Sllovakia, Spanja, Shqipëria, Bosnja dhe Hercegovina, Kolumbia, Gjeorgjia, Islanda, Maqedonia e Veriut, Serbia, Zvicra, Shtetet e Bashkuara.
Reagon policia shqiptare
Ndërkohë edhe policia shqiptare ka reaguar dje pas operacionit Shield të Europolit për të goditur trafikimin e barnave. Me anë të një njoftimi për mediat, Policia ka theksuar se operacioni i Europol u zhvillua në një periudhë 7 mujore, nga muaji maj deri në tetor të këtij viti. Gjatë operacionit, në njoftim theksohet se në Shqipëri janë zhvilluar 6 operacione dhe megaoperacioni si dhe janë arrestuar 14 persona.
Po ashtu në vendin tonë janë sekuestruar dhe medikamente me vlerë mbi 100 mijë euro. “Policia shqiptare ishte pjesë e operacionit ndërkombëtar “Shield”, i koordinuar nga Europol, për goditjen e trafikimit të barnave të falsifikuara dhe të substancave të rrezikshme për shëndetin. Operacioni u zhvillua nga muaji prill deri në muajin tetor të vitit 2022, u drejtua nga Franca, Greqia, Italia dhe Spanja dhe përfshiu policinë dhe autoritetet doganore të 28 vendeve. Gjatë periudhës 7-mujore të zhvillimit të këtij operacioni ndërkombëtar, Policia shqiptare ka zhvilluar 6 operacione dhe megaoperacione për goditjen e kontrabandimit të barnave mjekësore.
Gjatë këtyre operacioneve janë vënë në pranga 14 shtetas, janë proceduar penalisht 6 shtetas, si dhe janë sekuestruar medikamente të ndryshme mjekësore, me vlerë mbi 100 000 euro. Gjatë operacionit ndërkombëtar “Shield”, në të gjitha vendet e përfshira, u goditën 59 grupe kriminale dhe u ndaluan 349 persona të dyshuar. Gjithashtu, gjatë operacionit u sekuestruan sasi të mëdha të barnave të falsifikuara, substanca dopingu, suplemente të paligjshme ushqimore dhe sportive, vaksina të falsifikuara kundër COVID-it, produkte sanitare dhe pajisje mjekësore”, thuhet në njoftim.
Po ashtu, policia premton se do luftojë me zero tolerancë paligjshmëritë në vend. “Policia e Shtetit është e angazhuar dhe shumë e vendosur për të punuar ngushtësisht me partnerët, në përmbushjen e misionit të përbashkët, luftës kundër krimeve ekonomike e financiare, korrupsionit, pastrimit të parave, krimit të organizuar dhe terrorizmit”, bën me dije Policia e Shtetit.
