UEFA po publikon në vazhdimësi pjesë nga raporti i saj për dosjen “Skënderbeu” e cila është voluminoze dhe poshtëruese për ekipin shtatë herë kampion në Shqipëri. UEFA ka bërë lidhje të gjera e në shumë plane për të dalë në konkluzionet e saj, duke analizuar videot e ndeshjeve nëpërmjet specialistëve përkatës, duke vrojtuar luhatjet e koeficientëve të basteve sipas golave dhe minuatve të ndeshjes, si dhe metoda matematikoro-statistikore që janë shfrytëzuar nga kompanitë e specializuara. Të gjitha këto e kanë zhytur Skënderbeun.
Raporti i UEFA-s tregon se si gjithçka është analizuar në detajet më të hollësishme, për të mos i lënë asgjë rastësisë dhe për të arritur në konkluzionin se ndeshjet e skuadrës korçare në aktivitetet europiane apo edhe në Shqipëri ishin të trukuara.
Ja cfarë thotë raporti
71.Pamjet televizive të disa prej ndeshjeve të sinjalizuara nga BFDS tregojnë qartësisht se disa nga veprimet në fushën e lojës janë rezultat i manipulimeve të dukshme, me një mungesë respekti të thekuar kundër komunitetit të futbollit dhe parimeve bazë të sportit. UEFA do të tregojë se veprimet në fushën e lojës janë gjithmonë të lidhura me aktivitete bastesh që nuk mund të shpjegohen nga asnjë gjë tjetër përveçse bastexhinjtë zotëronin informacione nga brenda klubit.
72.Pjesa më e madhe e pamjeve televizive janë prova e një mbrojtje të keqe të qëllimshme. Jo të gjitha aksionet përfundojnë me gol, por është gjithmonë e qartë se si mbrojtësit ngulmojnë në refuzimin e tyre për të sulmuar kundërshtarët, në mënyrë që t’u lejojnë atyre hapësirën më të madhe për të shënuar.
73.Tendenca e të gjithë ndeshjeve të analizuara në këtë raport është gjithmonë e njëjta: ishin gjithmonë përpjekje manipulimesh që të përfitonin në mënyrë kriminale nga bastet në një shkallë tronditëse botërore. Përmasa e këtij manipulimi ishte aq alarmuese sa kompanitë e basteve në botë kanë hequr Skënderbeun nga listat e tyre dhe disa refuzuan që të ofronin baste për ndeshjet e tyre.
Sikur të mos mjaftonte shpjegimi i mësipërm, ekspertët e UEFA-s kanë analizuar edhe një statistike domethënëse, atë të gjuajtjeve në portë që pësojnë korçarët mesatarisht në ndeshjet e tyre dhe që është më e lartë në ndeshjet e dyshuara.
“Paneli i ekspertëve gjithatu vëren se ka një sasi të pazakontë gjuajtesh në portë të lejuara nga Skënderbeu në dy nga ndeshjet (kudnër Kruzeidërs dhe Sporting Lisbonës). Duke marrë në konsideratë faktin që Skënderbeu normalisht përballet me 4,59 gjuajtje në portë si mesatare brenda 90 minutave, atëherë të përballesh me 10 situata në 6 minutat e fundit në ndeshjen ndaj Kruzejdërs është një fakt domethenës dhe komplet i pazakontë”, shkruhet në raportin e UEFA-s. Të gjitha këto tregojnë se UEFA ka prej një kohe të gjatë që e ndjek Skënderbeun në rrugëtimin e tij dhe ka mbledhur informacione që e implikojnë rëndë klubin korcar. /Pamfleti.com
