Kryeministri Edi Rama ka paralajmëruar një krizë të rëndë që na pret muajt e ardhshëm.
Ai doli në një konferencë të jashtëzakonshme për shtyp, si për ironi në kohe dreke, kur shumica e njerëzve ishin shtruar për të ngrënë, për të thënë se do të rriten çmimet e energjisë dhe karburanteve.
Dhe sapo Rama mbaroi fjalën, karburantet në Tiranë nuk priten shumë, por rritën çmimet direkt edhe me 10 lekë, natyrisht të stimuluar nga fjalimi i Ramës, i cili duket se u dha dorë të lirë dhe justifikim, të gjithë bizneseve që tani e tutje të rrisin çmimet, meqë jemi në krizë.
Rama nuk shpjegoi se çfarë masash do të marrë qeveria për zbutjen e efekteve negative në ekonomi.
Ai tha se do të mbrohen shtresat në nevojë, konsumatorët familjarë dhe bizneset e vogla, por nuk dha asnjë variant se si dhe sa do të rritet çmimi i energjisë në Shqipëri dhe si do të shmanget rëndimi i buxheteve familjare nga efekti zinxhir i krizës.
Dhe për më tepër, ok Qeveria mund të ndihmojë shtresat në nevojë dhe mund të rrisë edhe rrogat për administratën, por çfarë do të bëhet me ata që punojnë në sektorin privat? Kush do t’i ndihmojë ata, nëse rrogat e tyre nuk rriten?
Sepse jo për gjë, por muajt e fundit shpenzimet janë rritur ndjeshëm, ndërsa rrogat kanë mbetur në vend dhe me këto rritme, me gjasë do të kemi një kolaps të rëndë për familjet shqiptare, shumica e të cilave thjesht mbijetojnë.
Interesant ndërkohë është fakti se ai e shpjegoi krizën, më së shumti me faktorë ndërkombëtarë.
Së pari, tha se ishte rritja e kërkesës për energji si pjesë e rimëkëmbjes ekonomike pas pandemise.
Së dyti, ishin përpjekjet për frenimin e ndryshimeve klimatike.
Së treti, një seri eventesh të motit ekstrem, që kanë ndikuar si tek kërkesa, ashtu edhe tek oferta për gaz dhe së katërti, përmendi prodhimin e pakët të energjisë nga impiantet e erës në Europë.
Pastaj tha se çmimet janë rritur edhe në disa vende të Europës.
Në Britani, sipas Ramës, do të rritet çmimi i energjisë për 15 milion familje.
Në Itali, Rama tha se qytetarët janë njoftuar për rritje 40% të çmimit të energjisë dhe në Bullgari, sipas tij, çmimet janë rritur 72% që nga fillimi i vitit.
Por, ajo që mungoi në shpjegimin e Ramës, është si si shpjegohet fakti që Shqipëria, një vend me burimet më të mëdha hidrike në Ballkan e Europë, nuk prodhon dot energji për veten e saj dhe për më tepër, për çfarë janë përdorur paratë e përfituara nga shitja e energjisë, gjatë periudhës kur ka pasur super prodhim, kryesisht në dimër.
Natyrisht, nuk shpjegoi as pse nafta shqiptare nuk rafinohet në vend, nuk foli as për kompanitë që nxjerrin naftë e nuk paguajnë asnjë taksë, apo për monopolet në fushën e naftës dhe energjisë.
Se është e vërtetë që mund të ketë krizë globale dhe faktorë që shpjegoi Rama, por në rastin e Shqipërisë këto mund të ishin shmangur, nëse do të menaxhoheshin si duhet burimet e energjisë dhe karburanteve dhe nuk do t’ua linim në dorë monopeleve.
Ndaj dhe tani do të duhet të dëgjojme refrenin, nga lufta vijmë, në luftë shkojmë.
