Një tjetër kandidat i Lëvizjes Socialiste për Integrim ka dorëzuar sot në KQZ, formularin e dekriminalizimit dhe për rrjedhojë kërkon të marrë mandatin e deputetit.
Burime të “Panorama” bëjnë me dije se në KQZ është dorëzuar sot formulari i kandidatit të LSI-së, Ralf Gjoni.
Gjoni ka qenë në zgjedhjet e fundit në listën e LSI-së në Qarkun e Tiranës.
Ai ka qenë i 11-ti në listë, ndërkohë që pas dorëheqjes së deputetëve të LSI-së ai kërkon të përfitojë mandatin e deputetit.
Aktualisht nga LSI kanë marrë mandatin 4 kandidatë, të cilët u betuan në Parlament.
Karriera
Ralf Gjoni para se të bashkohej me LSI-në ka qenë një ndër drejtuesit e organizatës “Mjaft”.
Ndërkohë që në zgjedhjet e 2009 ai u bë zëdhënësi i fushatës së LSI-së që në atë kohë drejtohej nga Ilir Meta.
Ai që nga viti 2012 ka qenë anëtar i strukturave drejtuese të LSI-ë, ndërkohë ka mbajtur dhe postin se Sekretarit për Marrëdhëniet me Jashtë në këtë forcë politike.
Qëndrimi
Në një status në Facebook më datë 27 shkurt kur u doli për here të parë në media emri i tij si person që nuk kishte firmosur dorëheqjen, Gjoni shkruante se vendimi do të ishte i tij personal dhe ai do të konsultohej me ndërkombëtarët.
“Shoh se më është lakuar emri nga mediat si një prej kandidatëve për të marrë mandatin e deputetit të Republikës së Shqipërisë. Si shpeshherë, në Shqipëri media flet përpara institucionit. Në respekt të të gjithë votuesve të listës zgjedhore ku ndodhet emri im, dhe në përgjigje të interesit mediatik dua të sqaroj se nuk kam asnjë kontaktim zyrtar nga KQZ lidhur me vakancat e shpallura, dhe në këto kushte nuk mund të marr dot asnjë vendim formal. Ndërkohë duhet të jetë e qartë për këdo se mandati është individual dhe për rrjedhojë edhe vendimi mbetet totalisht i imi, në dinjitetin e personit dhe reputacionit që kam ndërtuar, larg kolektivitetit partiak, larg çdo pazari apo presioni, në konsultim të ngushtë me miqtë e mi të shumtë ndërkombëtarë, rrethin tim miqësor e familjar, dhe mbi të gjitha, në shërbim të vendit tim ku 10 vjet më parë vendosa të kthehesha familjarisht. Deri në atë moment, kërkoj mirëkuptimin tuaj dhe vlerësoj çdo mendim të votuesve dhe miqve të mi të vërtetë përmes telefonit. Ju falenderoj!”, shkruante Gjoni
