Ish-drejtuesi i lartë i Policisë, Mit’hat Havari ka bërë një paralele mes tërmetit që ka tronditur vendin ditët e fundit dhe atij që shkaktoi tërmeti nga shpërthimi në Gërdec në vitin 2008. Havari ka treguar se si dora e pushtetit është shumë herë më e ashpër se dora e Zotit apo e Natyrës. Sipas tij, nga tërmeti natyral nuk pati viktima, por nga tërmeti njerëzor vdiqën 26 persona të pafajshëm.
“Ndryshimi mes dy tërmeteve, këtij natyral dhe Gërdecit, qëndron në faktin se natyrali nuk vrau asnjë njeri dhe dëmtimet në banesa ishin të kujdesshme nga dora e zotit, kurse tërmeti i Gërdecit që u shkaktua nga dora vrastare e pushtetit të kohës, vrau dhjetra njerëz të pa fajshëm përfshi dhe fëmijë, plus që u shfaros një fshat i tërë dhe u rindërtua nga e para me djersën e popullit shqiptar, që në fakt duhej të ndërtohej me lekët e të pangopurve të politikës”, tha ai.
Reagon Ngjela
Përveç Mit’hat Havarit, ka reaguar dhe avokati i njohur Spartak Ngjela. Përmes një postimi në faqen e tij, sulmoi presidentin Ilir Meta, duke e cilësuar atë orakull, pasi ky i fundit paralajmëroi tërmet me pasoja të mëdha pak javë më parë. “Meta po del më tepër se një orakull për të treguar se ai, jo vetëm i di kur bien tërmetet, por, madje, ai sikur i ka në dorë tërmetet ashtu siç kishte Zeusi rrufetë”, deklaroi ai. Por sulmeve të Ngjelës nuk i ka shpëtuar as ish-kryeministri Sali Berisha, të cilin e bëri fajtor se do destabilizimin e Shqipërisë. Sipas tij, media pranë Berishës përhapin lajme të pavërteta që të çojnë vendin në kaos e panik. “Pas tij, edhe mediat e Saliut u lëshuan në lajme pro tërmeteve, për të trembur shqiptarët. Po pse e kanë këtë lloj qëllimi? Është psikologjia e keqbërësit të kapur që vuan ardhjen e padisë penale. Ai do shkatërrimin e gjithçkaje. Është në fakt shprehja e famshme e Luigjit të Katërmbëdhjetë: “A pres moi le deluge”-pas meje qameti të bëhet. Janë në hall, prandaj. Por ja që, orakulli, është një nocion abstrakt dhe që i takon përrallave”, u shpreh ai. Ndërkohë, Ngjela vijoi akuzat duke deklaruar se Meta kërkon shkatërrimin dhe destabilizimin e Shqipërisë, nga frika se do të shkarkohet nga posti Presidentit të Republikës. “Por Meta, siç duket, kërkon t’i thotë Komisionit të Venecias: “Kujdes me mendimin juridik për dekretet e mia, se ua mbyta Venecian!”. Madje shtypi i Metës dhe Presidenca e tij, duket sikur thonë: “Meta është një Zeus, ruajuni nga rrufetë e tij”. Siç duket, korrupsioni shqiptar po kërkon të bëjë revolucion me anë të pështjellimit tërmetëror në Shqipëri. Është për të qeshur, por, këta janë, nuk ke ç’t’iu bësh! Dhe mos harroni se këta kapacitete bosh kanë qeverisur Shqipërinë për 12 vjet. Tani po duan të mbjellin frikë me tërmetet dhe kuptohet se edhe po i presin me ankth që tërmetet të vijnë radhë, për muaj të tërë. Duan shkallmimin e Shqipërisë që në Shqipërinë e shkatërruar pastaj, të sjellin destabilizimin shoqëror, të cilin ka dy vjet që po e kërkojnë. Kanë të drejtë të shpresojnë për të shpëtuar nga ndëshkimi për korrupsion, por kanë gjetur një rrugë magjish dhe shumë të ulët, edhe pse është qesharake. Po kërkojnë që tragjedinë e tyre individuale, ta kthejnë në një tragjedi kombëtare. Deri tani kërkonin pështjellim shoqëror, kurse tani shpresat i kanë te tërmetet”, nënvizoi Ngjela.
Arbjona Çibuku
