Avokati Spartak Ngjela e ka cilësuar ngjarjen e shumëpërfolur të vrasjes së ekstremistrit grek, që hapi zjarr ndaj policisë shqiptare, si një akt terrorist kundër policisë. Në një reagim për “Sot”, avokati Ngjela e cilësoi si të duhur reagimin e policisë, duke sqaruar se personi që kanë patur përballë ka qenë i rrezikshëm.
Avokati shtoi se shteti grek që reagon kaq shumë, duhet të kishte marrë masa që një ngjarje e tillë të mos kishte ndodhur.
“Këtë ngjarje nuk e shikoj si një ngjarje të kurdisur nga politike greke, kurrsesi por e vlerësoj si një akt ekstremist. Veprimi i policisë ishte i duhuri pasi në këto raste për të shmangur një dëm të madh duhet të neutralizojmë një më të vogël.
Prania e forcave RENEA e cila ka ardhur në ndihmë të policisë lokale është një veprim i cili e justifikon çdo gjë, pasi policia në këtë rast thjesht di faktin se përballë ka një person të armatosur dhe për më tepër të rrezikshëm dhe se di se ai është ekstremist, grek apo shqiptar.
Forcat RENEA kanë qenë në një situate të nevojave ekstreme. Jetojmë në kohën e rrezikut të terrorizmit. Ata thonë që mund të ishin marrë masa tjera, po mirë merrini masat ju që të mos na vijnë këtu njerëz të armatosur”, deklaroi avokati Spartak Ngjela.
