Plas skandali me emrat e emëruar në Gjykatën Kushtetuese. Vitin që lamë pas pati një luftë të fortë politike për të emëruar në gjykatën më të rëndësishme të vendit njerëz sa më besnikë të politikës.
Kjo luftë ka bërë që aty të emërohen njerëz të papërshtatshëm. Gazeta “SOT” ka mësuar se një anëtari të Gjykatës Kushtetuese i është refuzuar pajisja me certifikatë sigurie nga Drejtoria për Sigurimin e Informacionit të Klasifikuar (DSIK). Në momentin që Kuvendi dorëzoi dosjen për shkarkimin e presidentit Ilir Meta nga detyra, mësohet se Kushtetuesja ka kërkuar që 7 anëtarët e saj të pajisen me certifikatë sigurie, duke qenë se do të shqyrtohen edhe dokumente sekrete.
Kuvendi ka dorëzuar të dhëna të marra nga SHISH, policia e prokuroria, të cilat konsiderohen sekrete. Kjo do të thotë se këto të dhëna nuk mund të shihen nga individë të pajisur me certifikatë sigurie dhe për këtë arsye Kushtetuesja ka kërkuar pajisjen e gjyqtarëve. Mirëpo nga 7 gjyqtarë, mësohet se njërit prej tyre i është refuzuar certifikata.
Sipas burimeve, DSIK e konsideron gjyqtarin si person të papërshtatshëm dhe aspak të sigurt. Pra ai nuk mund të ketë akses në informacione sekrete, pasi ka shumë gjasë që ato të dhëna të nxirren në publik prej tij apo mund t’u komunikohen subjekteve të tjera.
Refuzimi i certifikatës së sigurisë për një anëtar të Kushtetueses është shumë e rëndë, pasi bëhet fjalë për një gjyqtar që mund të ketë në dorë shumë dokumente sekrete. Në rastin e presidentit, dokumentet sekrete mund të jenë vendimtare për fatin e tij. Në momentin që gjyqtari nuk njihet me to, mund të marrë një vendim të pasaktë pro apo kundër presidentit. Sinjalet janë se mund të kemi përjashtimin e tij nga procesi për shkarkimin e Metës, por mbetet të shihen zhvillimet.
Ky është një rast i paprecedentë, pasi një anëtar i Kushtetueses kurrsesi s’mund të jetë pa certifikatë sigurie, pasi ai ka shumë çështje në dorë dhe nëse i nxjerr në publik nuk mban asnjë përgjegjësi penale. Me shumë gjasë në Kushtetuese do të përfundojë dhe marrëveshja që mund të kemi me Greqinë. Aty ka shumë dosje sekrete dhe sërish ky gjyqtar i bie që të përjashtohet nga kjo çështje.
Verifikimi
Gazeta “SOT” ka të dhëna të plota për gjyqtarin në fjalë, përfshirë dhe identitetin e tij, por për arsye etike nuk po publikon të dhënat. Ajo që bie në sy është se nuk ka pasur një verifikim si duhet për këtë gjyqtar nga ana e Këshillit të Emërimeve në Drejtësi. Vetë KED bashkëpunon me DSIK dhe kjo e fundit dërgon të dhëna sa i takon figurës së secilit kandidat.
DSIK është ai që përcakton nëse kemi të bëjmë me një individ të shoqëruar me kriminelë, të korruptuar, është pjesë e shërbimeve apo njeri i dyshimtë. Për gjyqtarin në fjalë DSIK ka dërguar një raport negativ në KED. Në ditët në vijim gazeta do nxjerrë fakte të tjera sa i takon kësaj pjese.
Por KED, e ndodhur në presion të fortë në vitet 2019 dhe 2020, i refuzoi këto informacione duke mos i cilësuar të besueshme. Tani që gjyqtari ka aplikuar për certifikatë sigurie, DSIK e ka refuzuar duke mbajtur po të njëjtin qëndrim. Për DSIK ai është një person i papërshtatshëm dhe nuk mund të njihet me të dhëna konfidenciale. Mbetet të shihet se çfarë do vendosë Kushtetuesja, do e mbajë po pjesë të procesit për shkarkimin e presidentit apo do e mënjanojë.
