Kompania amerikane Meta Platforms, e cila zotëron Facebook, Instagram dhe WhatsApp, ka vonuar finalizimin e buxheteve për disa ekipe në përgatitje për një raund të ri pushimesh nga puna, raportoi Financial Times.
Dy punonjës të Meta-s i thanë gazetës se javët e fundit nuk ishte e qartë se cili do të ishte buxheti dhe numri i të punësuarve në të ardhmen.
Meta njoftoi në fillim të këtij muaji se pret që shpenzimet këtë vit të jenë midis 89 dhe 95 miliardë dollarë dhe CEO Mark Zuckerberg e quajti këtë vit “viti i efikasitetit”.
Nëntorin e kaluar, Meta pushoi nga puna më shumë se 11 mijë punëtorë, që përbën 13 për qind të fuqisë totale të punës. Zuckerberg tha se shkurtimet ishin “disa nga ndryshimet më të vështira që janë bërë në historinë” e kompanisë.
Zuckerberg më pas deklaroi se kompania do të reduktojë kostot dhe do të zgjasë vendimin për ngrirjen e punësimeve të reja edhe në tremujorin e parë.
“Në fillimin e pandemisë, bota lëvizi me shpejtësi drejt internetit dhe vala e tregtisë elektronike çoi në një rritje të madhe të të ardhurave. Shumë njerëz parashikuan se ky do të ishte një përshpejtim i qëndrueshëm që do të vazhdonte edhe pas përfundimit të pandemisë. Kështu kam bërë edhe unë, ndaj kam marrë vendimin për të rritur ndjeshëm investimet”, shkruan Zuckerberg në një letër drejtuar punonjësve të Meta.
Ai shtoi se nuk ndodhi ashtu siç priste: “Jo vetëm që tregtia online u kthye në tendencat e mëparshme, por edhe rënia makroekonomike, rritja e konkurrencës dhe humbja e reklamave bënë që të ardhurat tona të ishin shumë më të ulëta nga sa prisja. Kam bërë një gabim dhe mbaj përgjegjësinë për të”.
