Nga Alba Malltezi
Njeriu i zi, me syze të zeza vazhdon ta kërcënojë hapur
Ndërsa Drejtësia tepër e brishtë shqiptare po mundohet të krijojë shtyllën e saj kurrizore për të qëndruar në këmbë, siç një grua e drejtësisë e shprehu sot në transmetimet Live të emërimit të drejtuesit të ri të SPAK, një njeri i zi, me syze të zeza, me njolla të zeza nën to, por sidomos në ndërgjegjen e tij, thërret: Kjo është një Drejtësi e tmerrshme dhe risjell para shqiptarëve sërish një kufomë. Sepse këtë di ta bëjë vërtetë më mirë: Përdor kufoma shqiptarësh sa herë është në vështirësi!
Por personi i sipërpërshkruar vazhdon të ketë sot zë dhe çjerrje për të deformuar realitetin falë asaj Drejtësie që me një pasion të jashtëzakonshëm në vitet e sundimit të tij ia preu këmbët, pastaj duart, pastaj mendjen dhe shpirtin.
Nuk është e lehtë të ringrihet, të riformohet, të rindërtohet një Drejtësi e re, sidomos kur Njeriu i Zi, me Syze të Zeza e shpirt të Zi, u qëndron akoma me kosën e tij mbi krye të gjithëve. Totalisht të gjithë atyre që i sheh si një kërcënim, si njerëz të lirë të flasin e të veprojnë nga ai ndryshe.
Përfshi edhe ambasadoren e Shteteve të Bashkuara Yuri Kim. “Kimete” e thërrasin me përçmim të tijët dhe mendoni kur nuk përmbahet të sulmojë gruan që përfaqëson shtetin më të fuqishëm në botën, perceptojeni të gjithë se çfarë ky njeri i zi, u ka bërë dhe vazhdon t’i bëjë çdo shqiptari dhe çdo djali e vajze të sistemit të Drejtësisë. Të asaj Drejtësie që po përpiqet të shpëtojë nga kthetrat e zeza të tij.
“Kjo”, i drejtohet ambasadores, dhe ne refren me epitete e përçmime e vazhdojnë lojën të gjithë duartrokitësit e tij. Me të njëjtën gjuhë që iu është drejtruar në 30 vite vajzave dhe grave që nuk i kanë pëlqyer atij, Njeriut të Zi.
Nuk e di nëse shqiptarët dhe shqiptaret, që ia kanë dedikuar jetën këtij profesioni të bukur, do ta çojnë deri në fund, në mos të përsosur, të paktën drejt, në këmbë dhe me kokën lart misionin e rimëkëmbjes së Drejtësisë. Nëse kjo arrihet, do të thotë se nuk ka më mundësi të krijohen në këtë vend njerëz të Stërmëdhenj e Stërkërcënues me syze të zeza dhe shpirt të zi.
