Pakënaqësitë e ish ministrit të Jashtëm, Ditmir Bushati janë pritur entusiazëm frenetik nga kundërshtarët e KM Rama, si ata opozitarë por dhe socialistët e pakënaqur nga ai.
Gjuha e përdorur nga Ditmir Bushati ishte më shumë diplomaci e kulluar se një kontestim brutal ndaj KM Rama. Një pjesë e tyre qëndrojnë plotësisht, ndërkohë që analiza reale e Bushatit duhet të ishte më e ashpër në drejtim të qeverisjes për njëmijë e kusur probleme që ajo ka në raport me sjelljen ndaj qytetarit, arrogancën apo dhe problematikat në fushën e krimit.
Bushati ka kohë që është distancuar nga KM Rama dhe nuk shihet asnjë gjë e veçantë në këtë qëndrim. Është normale që kushdo që largohet nga një post të krijojë pakënaqësi. Reagimi i Bushatit është mëse njerëzor, për më shumë duke parë se me kë është zëvendësuar, nivelin intelektual të pasuesit në raport me vetveten, si dhe largimin nga qeveria pa ndonjë arsye të qartë.
Qëndrimi i Bushatit nuk kishte asgjë më shumë nga vetë qëndrimi i KM në raport me opozitën. Orgazmimi i shumicës së entusiazmuar nga deklarata e Bushatit konsistonte në faktin se ish kryediplomati nuk përmendi rilindjen por PS dhe socialistë, duke ju drejtuar Majkos, Ulqinit dhe Ruçit për të gjetur gjuhën mes tyre.
Kanë folur më shumë socialistët kundër Nanos, Metës, Majkos apo dhe Ramës kur kanë pasur pushtet. zëra kundr kjo parti ka pasur pa fund, por asgjë nuk e ka shpërbërë.
Aktivizimi i Bushatit është një rrjedhë normale në një parti që historikisht ka gëluar nga zërat kundër. Partia Socialiste është një parti që e ka vetëpastruar të kaluarën e saj. Shumë pak figura janë sot pjesë e saj ndërkohë që e kundërta ndodh me simotrën e saj opozitare që vazhdon të jetë peng i një njeriu të dalë si pjesë e një aksidenti teknologjik në laboratirn e Partisë së Punës.
A ka të drejtë Bushati në prononcimin e tij për rikthim të Partisë Socialiste te socialistët duke e larguar nga rilindja?
Shumë abstrakte është vetë terminologjia që mundohen të përdorin kundërshtarët e Ramës me konceptin rilindje, ku PS është ai detashment gjigant politik shumë herë më i fuqishëm se kurrë më parë që nga dita e themelimit të saj. Ka qenë aftësia e liderit të saj, që PS, pas shumë bashkëqeverisjesh me parti bishta, drejton e vetme mazhorancën.
ëKy është një fakt i pakontestueshëm aq sa është fakt i pakontestueshëm që ky sukses është meritë e padiskutueshme e Edi Ramës, i cili e drejtoi i vetëm fushatën në çdo qelizë të kombit duke ju mbushur mendjen qytetarëve se tepsia që do merrte ai do kishte vetëm ata brenda dhe jo LSI apo ndonjë parti karavidhe që i ngjitej si garniturë.
Nëse Bushati ju drejtohet socialistëve duke menduar që ka dy sekte brenda mazhorancës, rilindas dhe socialistë, gabohet rëndë. Sot në PS ka vetëm një palë dhe këta janë socialistë, por socialistë që ndjekin rrugën e liderit dhe kanë marrë formën e tij. Nëse dikur do vijë dikush tjetër padyshim që këta do jenë socialistë, por që do ambientohen me parimet e lidershipit të ri.
Përsa i përket pyetjes nëse ka apo jo gabime qeverisja shqiptare?
Ka plot.
Që nga futja e njerëzve të inkriminuar në parlament dhe në krye të bashkive, emërimi i ministrave pa identitet dhe që kanë kompromentuar seriozisht këtë qeverisje, PPP, rritja e krimit të rrugës, krimit të organizuar, kanabizimi i vendit dhe hartimi i plot ligjeve problematike, tenderime të dyshimta e plot e plot defekte të tjera.
Pozitivitet?
Pafund.
Sot nuk ke qytet provincë që nuk është rivitalizuar nga projektet ambicioze të qeverisë, ndryshimet në modelin e administrimit dhe rekrutimit të administratës publike, shërbimin dhe rritjen e përkujdesit ndaj qytetarit, shërbimi në shëndetësi dhe për më shumë reforma në drejtësi.
Reforma në Drejtësi është padiskutim meritë e mazhorancës dhe e vetmja zgjidhje që ky komb të mos bjerë në dorëne kasapëve të drejtësisë, të cilët u kthyen në një lloj Cosa Nostra, mafie e rezikshme që rrezikonte seriozish paqen sociale në vend.
Duke parë zhvillimet e fundit në vend, dalja në skenë e Bushatit ishte një veprim inteligjent që pasuroi historinë pluraliste dhe pluriqëndrimin në Partinë Socialiste. Por, duke parë pritshmërinë e opozitës dhe zërave anti mazhorancë, si dhe duke huazuar në këtë rast një shprehje të Edi Ramës, Ndoc Rokun do kenë partia e çizmeve dhe e hollandezit fluturues me Bushati pro apo kundër.
