Ndërtesa gjendet në qendër të Tiranës në lagjen që njihet si ish-Blloku, ku gjatë diktaturës komuniste 1944-1991 jetuan familjet e kupolës së njërit prej regjimeve më të egra të Lindjes. Me ardhjen në pushtet të partisë së parë pluraliste, Partisë Demokratike, në vitin 1992, mori fund edhe regjimi komunist.
Enver Hoxha e drejtoi Shqipërinë me dorë të hekurt derisa vdiq në vitin 1985, ndërsa pasardhësi i tij, Ramiz Alia ishte i fundit president që iku nga pushteti në të gjithë vendet e Lindjes pas rënies së “Perdes së hekurt”.
Megjithatë, duhet theksuar se banesa e ish-diktatorit, është një ndër të paktat prona publike që nuk i ka dalë ende “pronari”.
Godina ku jetoi diktatori Enver Hoxha, po rikonstruktohet.
Vila nuk kishte asnjë funksion prej rënies se regjimit komunist në 1990. Pas investimit të fundit ajo po bëhet gati të marrë një destinacion të ri. Gjatë vizitës së parë në Shqipëri të presidentit francez Emanuel Makron, kryeministri Edi Rama deklaroi se vila e ish diktatorit do të shndërrohej në një “strehë arti”, por pa dhënë detaje.
“Thamë se në këto mure duhet bërë gjithçka që urrente pronari i mëparshëm dhe atë që donte të largonte. Një nga gjërat më të urryera të diktaturës dhe Enver Hoxhës ishte pikërisht shprehja e lirë e artistëve. Si përfundim e vendosëm këtë dhe filluam duke bërë hapa duke hapur dyert e kësaj shtëpie për krijuesit e rinj. Nuk po e fshijmë totalisht të kaluarën por po e kthejmë në burim energjie të lirisë së shprehjes me respekt dhe admirim”, tha Rama në 17 tetor të 2023.
Sipas vendimit të Këshillit të Ministrave në tetor të vitit të shkuar vila do të jepej për shfrytëzim për një projekt kulturor. Disa ambiente të kësaj ndërtese do të shfrytëzohen për realizimin e projektit “Vila Art Rezidencë Tirana”.
Zbatimi i projektit po mbikqyret nga Ministria e Kulturës, e cila do të marrë përsipër vetëm tarifat e furnizimit me energji elektrike dhe ujë, si dhe koston e mirëmbajtjes së trajtimit të këtyre ambienteve gjatë gjithë periudhës së dhënies në shfrytëzim.
FOTO/ Nuk i doli “pronari”, rikonstruktohet pas 31 vitesh
Pas vitit 1991, shtesa e re e ndërtesës që ishte bërë në vitin 1973, u menaxhua nga Drejtoria e Shërbimeve Qeveritare dhe ka shërbyer për pritje zyrtare dhe aktivitete të ndryshme. Pjesa e vjetër e saj ka funksionuar si biznes. Ministrja e Kulturës tha se në vilë nuk janë bërë restaurime të plota pasi ka qenë dilema nëse kjo vilë duhej të ruhej si dëshmi e 50 vjetëve të rrëmbyera nga jetët e gjithë shqiptarëve.
