Konferenca e Donatorëve ka rezultuar frytdhënëse për Shqipërinë, e cila arriti të merrte një fond prej 1.15 miliardë eurosh për programin e rindërtimit.
Rreth 800 milionë euro janë para në formën e huave të dhëna nga grupet e bankave në mbështetje të rimëkëmbjes së biznesit dhe sektorit të turizmit. Prodhimi ishte një ndër më të goditurit, dhe dëmet në sektorin e turizmit lidhen më tepër me të ardhmen, sesa me humbjet materiale të pësuara.
Më pak se 400 milionë euro kanë qenë para të dhuruara nga shtetet pjesëmarrëse të konferencës. Shumica e tyre do të shërbejnë për plotësimin e nevojave të rindërtimit, qoftë ndërtimit të banesave, shkollave, apo infrastrukturës.
Turqia dhe Emiratet e Bashkuara dhuruan 115 milionë euro, posaçërisht për ndërtimin e shtëpive.
Sllovenia dhe Sllovakia dhuruan 750 mijë euro të dedikuara për ndërtimin e shkollave të dëmtuara. Një pjesë e parave u dhuruan dhe për mbrojtjen civile dhe personat në nevojë, si UNICEF-i, Irlanda, apo Luksemburgu. Ndërkohë interesante ishte dhurimi i Hungarisë për rindërtimin e kishave të dëmtuara, apo SHBA që dhuruan 800 mijë dollarë për monumentet e kulturës.
Por aleati më i madh i Shqipërisë dhe disa vende të tjera dhuruan para për ecurinë e reformave ligjore që po ndërmerren nga qeveria shqiptare për të forcuar transparencën.
Përveç parave, shtetet u zotuan të ofronin gjithashtu asistencë teknike për rimëkëmbjen, trajnime për mbrojtjen sizmike e civile, asistencë psikologjike për personat në nevojë, dhe çfarëdo lloj ndihme tjetër që Shqipërisë do t’i nevojitet gjatë rimëkëmbjes.
