Nuk kam kryer asnjë krim”, ka deklaruar në Gjykatën e Apelit, ish-anëtari i UÇK-së, Dritan Goxhaj.
Ai është shprehur se para togave të zeza se “I kam shërbyer me mendje e zemër vendit tim! Çfarë kam bërë që të arrestohem për hatër të Serbisë?”.
Ndërsa avokati i tij e ka quajtur “politike” arrestimin e Goxhaj.
“Kërkesa për ekstradim është tërësisht politike dhe për t’u bërë qejfin Serbisë. Bie ndesh me Kushtetutën dhe konventat”, tha përfaqësuesi i tij ligjor, Bashkim Nikolla.
Dritan Goxhaj kishte kërkuar nga Apeli lirimin nga qelia, por togat e zeza vendosën masën e sigurisë “arrest me burg”.
Ish-anëtari i UÇK-së u arrestua më 31 Korrik dhe sipas Prokurorisë, arrestimi i tij u bë me qëllim ekstradimi, pas kërkesës së Gjykatës Speciale të Kosovës.
Prokuroria renditi edhe akuzat që rëndojnë mbi të nga Zyra e Prokurorit të Specializuar të Kosovës.
Edhe policia tha ne nje reagim se ka ekzekutuar vendimin e Gjykatës së Shkallës së Parë të Juridiksionit të Përgjithshëm Tiranë, e cila ka vendosur lejimin e kontrollit fizik dhe të banesës së shtetasit Dritan Goxhaj, si dhe caktimin e masës së sigurimit personal “Arrest në burg”, me qëllim ekstradimi.
Kush është Dritan Goxhaj
Dritan Goxhaj i është bashkuar UÇK-së si oficer i Ushtrisë Shqiptare në shkollën e aviacionit dhe ka pasur autorizimin e Shtabit të Përgjithshëm që të mbante kontakte me komandën e Forcave Amerikane në Shqipëri.
Ai është djali i ushtarakut Dilaver Goxhaj, i cili iu bashkua vullnetarisht UÇK-së, pas kërkesës së Shtabit të Përgjithshëm të UÇK-së, kur iu besua detyra e zëvendësshefit të Shtabit të Përgjithshëm të UÇK-së dhe, me angazhimin e NATO-s në luftë, iu besua detyra e oficerit të bashkëveprimit me NATO-n.
