Kjo listë notash mund të shpjegojë deri diku shifrën 869 mijë euro e theksuar që krye të dosjes së Erion Veliajt, e hedhur poshtë nga ky i fundit dhe bashkëshortja e tij si një fabrikim dashakeq. Faktet e pretenduara në dosje, të cilat po çmontohen çdo ditë, një nga një, nga vetë Erion Veliaj, do të shqyrtohen nga gjykatat, por mesatarja e ulët dhe notat kaluese të Ols Dados në lëndët kryesore në Universitetin e Tiranës, Fakulteti Drejtësisë, shtojnë dyshimet rreth paligjshmërisë së katapultimit të tij në funksion prokurori. Notat e Ols Dados në kontabilitet dhe e drejtë civile janë pesë, ndërsa në fiskulturë vlerësimi është maksimal, dhjetë.
Vërtetim notash për prokurorin Ols Dado, pasi përfundimit të studimeve për Drejtësi në Fakultetin Juridik
Notat në arsimin e mesëm të Ols Dados, i cili shfaqet herë noter, herë si prokuror, herë si ndërtues, herë si filozof në Athinë me bagazh Aristotelik dhe herë si violinist, janë edhe më skandaloze. Dado nuk plotësonte kriteret e mesateres për t’u regjistruar në Fakultetin Juridik në Tiranë, por u pranua në Fakultetin Juridik me listat e të përndjekurve të PD-së në vitin 1991.
Në një kurs me Argita Berishën, Sokol Olldashin, Ina Ramën, përfundoi pa lavdi fakultetin juridik dhe u diplomua “jurist”. Nga data 16.12.1995 deri në 15.2.1996 punoi pranë Ministrisë së Punës, Çështjeve Sociale e Shanseve të Barabarta. Nga data 16.2.1996 deri në 10.9.1996 punoi pranë “A.M.C” sh.a. Nga data 29.1.1997 deri në 8.11.2000 punoi pranë Bashkisë Durrës. Nga data 1.7.2003 deri në 29.9.2005 punoi në ish-Komisionin e Letrave me Vlerë. Në vitin 2008 bëhet noter pa konkurrim, duke hapur NIPT-in K52025501V, pasi e trashëgon licencën nga babai i tij, noteri Milto Dado, deri në vitin 2008.
Propozimi i prokurores së përgjithshme Ina Rama drejtuar presidentit Bamir Topi për emërimin e Ols Dado si prokuror në vitin 2008
Në 4 nëntor 2008, zonja Ina Rama, në atë kohë në funksionin e Prokurorit të Përgjithshëm, i propozon Bamir Topit, asokohe President, emërimin e Ols Dados prokuror në Progradec. Propozimin e saj, zonja Rama e mbështet në nenin 149 pika 3 të Kushtetutës dhe në nenin 8, pika 2, germa ‘b’ të ligjit nr. 8737 datë 12. 02. 2001 për organizimin dhe funksionimin e prokurorisë (i pa ndryshuar deri ditën e firmosjes së këtij propozimi). Mbështetur në të njëjtën bazë ligjore, Presidenti Bamir Topi, në 17 nëntor 2008, miraton propozimin e Ina Ramës, duke dekretuar emërimin e Ols Dados prokuror në Pogradec.
Dekreti i presidentit Topi për emërimin e Ols Dado si prokuror
Neni 17 i ligjit, përpos të tjerave, parashikonte që mund të emërohet prokuror shtetasi që ka mbaruar Shkollën e Magjistraturës. Neni 18 parashikon që mund të emërohet prokuror edhe personi që nuk e ka mbaruar Shkollën e Magjistraturës, por që ka punuar jo më pak se tre vjet pedagog në Shkollën e Magjistraturës, në Fakultetin Juridik, këshilltar ligjor, drejtues ose specialist në strukturat juridiko-profesionale në Kuvend, Presidencë, qeveri, Gjykatën e Lartë, Ministrinë e Drejtësisë, Avokatin e Popullit, deputet me arsim juridik dhe oficer i policisë gjyqësore.
Kriteret sipas ligjit për emërimin e prokurorëve
Ols Dado nuk plotësonte as kriteret e parashikuar në nenin 17 dhe as në nenin 18 të ligjit nr. 8737 datë 12. 02. 2001 për organizimin dhe funksionimin e prokurorisë. Dado kishte vetëm arsimin juridik dhe nuk kishte punuar 3 vite në një nga funksionet e parashikuara nga neni 18 i ligjit. Dado është emëruar në kundërshtim flagrant me ligjin në funksionin e prokurorit. Qëndrimi i tij çdo ditë e më shumë në SPAK thellon mosbesimin në drejtësinë e re, duke u kthyer në një kosto pikësëpari për vetë SPAK, por sidomos për ILD dhe KLP./ Prapaskena
