Edhe pse e gjithë vëmendja është e përqendruar te Covid-19, makthi për pushtetarët e korruptuar duket se po shtohet. Reforma në drejtësi është ngadalësuar, por qëndrimet e SHBA dhe BE të ditëve të fundit, janë një sinjal se nuk do të ketë asnjë kthim pas të saj.
Dje janë zbuluar detaje se në këto ditë të vështira, prokuroria vijon të punojë me qëllim që së shpejti të nisë lufta ndaj korrupsionit dhe pastrimit të parave. Dje kreu i Kuvendit, Gramoz Ruçi, pati një takim virtual me krerët e institucioneve të pavarura ku ju kërkoi llogari mbi zbatimin e rezolutave që ka miratuar Parlamenti. Kryeprokurori Olsian Çela deklaroi se institucioni i tij është përqendruar te pastrimi i parave. Ai u shpreh se ky fenomen është rritur ndjeshëm dhe është ngritur një ekip special vetëm për këtë çështje. “Shifrat janë inkurajuese, ka një përqindje dhe ngritje të numrit të personave të çuar për ndjekje penale për korrupsion. Edhe te hetimet proaktive ka një rritje.
Janë hasur probleme për sa i përket veprimeve hetimore për pastrimin e parave dhe sekuestrimin e aseteve kriminale. Ende ka shumë për të bërë. Ka vështirësi të natyrave të ndryshme. Prokuroria e Përgjithshme ka marrë një rol proaktiv. Për të rritur luftën kundër pastrimit të parave, ne jemi duke ndërmarrë një ristrukturim brenda prokurorisë që hetojnë këto vepra penale dhe të rrisim bashkëveprimin me institucionet e tjera”, tha Çela. BE ka vënë disa detyra shtëpie me qëllim avancimin e integrimit. Përfaqësuesit e drejtësisë deklaruan dje se janë gati të bashkëpunojnë për të çuar para reformën dhe për të rritur cilësinë e hetimeve. “Po draftojmë një memorandum me ministrinë e Ekonomisë, Brendshme dhe policisë për realizimin e objektivave. Shumë shpejt do të kemi rezultate konkrete. Do të ketë masa të tjera që do të lehtësojnë bashkëveprimin mes prokurorisë dhe policisë gjyqësore, jemi duke draftuar udhëzime të reja për menaxhimin e punës. Do të ishte e nevojshme që prokurori që do të caktohet pranë Eurojust të kishte tagrin e përfaqësimit të dy prokurorive, të përgjithshme dhe SPAK”, tha më tej Çela.
Pastrimi i parave
Kreu i prokurorisë deklaroi se fokus do jetë pastrimi i parave, por mbi këtë fushë ka hedhur më shumë dritë Ministria e Drejtësisë, e cila pak ditë më parë miratoi planin për luftën ndaj korrupsionit gjatë viteve 2020-2023. Aty tregohen detaje nga angazhimet e të gjithë institucioneve dhe theksohet se një fokus do të kenë dhe paratë e dërguara jashtë vendit. Sipas strategjisë, do të bashkëpunohet me EUROPOL, CEPOL, INTERPOL, CARIN, BAMIN, UNDC dhe OSBE për të gjurmuar paratë e pista.
Por nëse ndodh kjo, pritet të goditen shumë pushtetarë në vend. Nën rrogoz dihet se ka emra të njohur në politikën shqiptare që kanë fshehur para jashtë vendit. Fokusi kryesor është Londra, ndërsa nuk mbeten pas vende si Malta, Qipro apo Zvicra. Ka të tjerë që preferojnë ishujt Kajman dhe vende të tjera të parajsave fiskale. Por mes këtyre, është një emër i njohur në vend, me goxha pushtet, i cili ka fshehur rreth 80 milionë euro në Londër. Bëhet fjalë për një njeri me peshë, i cili ka dërguar shumë para në Britani dhe ka lidhje të forta me këtë vend. Nëse SPAK dhe organizata partnere do nisin gjurmimin e parave të pista, atëherë politikani në fjalë është njëri ndër më të rrezikuarit. “Përmirësimi i bashkëpunimit gjyqësor dhe policor ndërkombëtar në luftën kundër krimit ekonomik dhe financiar”, është një ndër prioritetet kryesore në strategjinë kundër korrupsionit.
Ndërsa disa objektiva të tjerë në luftën ndaj krimit ekonomik dhe korrupsionit janë: Trajnime të kryera me kolegë të agjencive homologe (sa të trajnuar femra dhe sa meshkuj). Ngritja e skuadrave të përbashkëta hetimore për hetimin e veprave penale në fushën e korrupsionit. Forcimi i kapaciteteve profesionale nëpërmjet trajnimeve dhe konferencave të përbashkëta me institucionet homologe ndërkombëtare.
