Komisioni Europian iu ka bërë dje thirrje autoriteteve shqiptare që të nisin hetimet ndaj politikanëve të korruptuar, të godasin krimin e organizuar dhe të çojnë para hekurave gjyqtarët e prokurorët e ngelur në veting.
Pak ditë më parë, Gjykata e Posaçme e Apelit Kundër Krimit të Organizuar dhe Korrupsionit dënoi me dy vite burg ish-Prokurorin e Përgjithshëm, Adriatik Llalla. Po pavarësisht këtij zhvillimi të rëndësishëm, KE nxit Shqipërinë që të vazhdojë përpjekjet për të vendosur një rekord pozitiv në luftën kundër korrupsionit.
E pyetur dje nga “TCH” për një koment, pas dënimit të ish-Kryeprokurorit Adriatik Llalla, zëdhënësja e Komisionit Europian, Anna Pisonero theksoi se institucionet e drejtësisë duhet të godasin me zero tolerancë korrupsionin dhe madje të sekuestrojnë pasuritë e vëna nga aktivitete kriminale.
“Shqipëria duhet të vazhdojë përpjekjet për të vendosur një rekord solid të hetimeve, gjykimeve dhe dënimit për korrupsion dhe akuza të lidhura me korrupsionin në nivele të larta, përfshirë konfiskimin e aseteve kriminale”, deklaroi ditën e djeshme zëdhënësja e Komisionit Europian, Anna Pisonero. Kujtojmë që ish-kryeprokurori Adriatik Llalla u dënua pak ditë më parë me dy vite burg me akuzën e fshehjes së pasurisë dhe me pesë vite përjashtim nga sistemi i drejtësisë.
Por, ekzekutimi i këtij vendimi mbetet ende pezull, pasi ish-kryeprokurori rezulton i larguar nga Shqipëria mes datave 7 dhe 10 shtator. Policia ka nxjerrë një urdhër arresti kombëtar ndaj Llallës, ndërsa pritet që shpejt të shpallet edhe në kërkim ndërkombëtar. Sipas disa informacioneve që qarkulluan pas dënimit të tij, herën e fundit ish-kryeprokurori është fotografuar në një stacion treni në Romë të Italisë. Vendndodhja e tij aktuale mbetet mister.
