Nga Rigels Seliman
Prej një muaji Shqipëria është në shtetrrethim, ndërsa shumica e qytetarëve janë në karantinë për shkak të masave drastike dhe të domosdoshme të marra nga qeveria për parandalimin e përhapjes së koronavirusit. Fatmirësisht, vijon ulja e ndjeshme e kurbës së koronavirusit në Shqipëri, pasi sipas Ministrisë së Shëndetësisë vetëm për 7 raste të reja në 24 orët e fundit, duke e çuar në 416 në total numrin e të infektuar me Covid-19.
Nga këta 23 qytetarë deri tani kanë humbur betejën, ndërkohë që 182 është numri në total i pacientëve të shëruar. E gjitha kjo tregon që masat e qeverisë dhe sidomos puna e mirë e mjekëve e infermierëve është bërë siç duhet, pavarësisht lehjeve të një pakice personash që po bëjnë çdo gjë për të përbaltur punën e manteleve të bardhe.
Kështu që, për mendimin tim bluzat e bardha meritojnë një mirënjohje të thellë publike dhe gjithë shpërblimet e mundshme, plotësisht të merituara. Por duke qenë se kryefjala e gjithë këtyre ditëve që jemi në karantinë me të drejtë janë mjekët e infermierët, të cilët janë në vijnë e parë të luftës sa i takon betejës frontale me koronavirusit, unë zgjodha që këtë radhë disa rreshta t’ua dedikoj uniformave blu, Forcave të Armatosura dhe gazetarëve.
Të treja këto kategori janë sot në terren, ku të parët e të dytët përpiqen të mbikëqyrin qytetarët se si këta të fundit po zbatojnë masat e qeverisë, ndërsa të tretët janë ata që përcjellin lajmin tek populli, duke zbuluar me detaje se çfarë po ndodhë dhe si paraqitet situata në Shqipërinë e bukur, pas mbërritjes së koronavirusit. E gjitha kjo nuk do shumë mend e kalem për të bërë analizën, nëse unë kam apo jo të drejtë.
Mirëpo, në kushtet kur prej një muaji kemi dëgjuar dhe etiketuar heronj vetëm bluzat e bardha, sot kemi, madje duhet t’i etiketojnë heronj edhe uniformat blu, Forcat e Armatosura dhe gazetarët. Po, po mos qeshni dhe mos më kritikon që po përpiqem të ngrejë në piedestale edhe këta bijë nënash që sot janë në terren, jo vetëm se ua kërkon atdheu, por edhe për faktin se betimin e Hipokratit në këtë rast nuk vlen vetëm për mjekët.
Kjo pasi ky lloj ligji moral i njeriut me profesionin mjekë që bëhet para se të fillojnë këtë profesion, tanimë është mishëruar aq bukur edhe tek policët, ushtarakët dhe njerëzve të medias. E gjitha kjo panoramë na imponon neve si qytetarë që pas mjekëve e infermierëve, duhet t’iu thërrasim “heronj” edhe uniformave blu, Forcave të Armatosura dhe gazetarëve, të cilët gjithashtu janë në vijën e parë e në terren, duke u përballur me armikun e padukshëm, Covid-19. Kështu që pa u zgjatur, unë dhe të gjithë ju që po lexoni këto rreshta, duhet të përulemi edhe për heronjtë e tjerë, të cilët janë uniformat blu, Forcat e Armatosura dhe gazetarët.
