Stërvitja “Defender Europe 21” i ka bërë bashkë 2 krerët e shtetit, të cilët kohëve të fundit kanë pasur jo pak përplasje në distancë, megjithatë, edhe në këtë rast ato kanë mbajtur distancë.
Nis sot nga Durrësi stërvitja më e madhe e realizuar ndonjëherë, 28 mijë trupa shumëkombëshe do të realizojnë operacione në 12 vende të ndryshme njëkohësisht
Kryeministri i vendit, Edi Rama dhe Presidenti, Ilir Meta, pas përplasjeve të forta në distancë janë bërë bashkë në Durrës. Në krah të kryeministrit Edi Rama qëndron ambasadorja amerikane Yuri Kim, teksa në krah të kreut të shtetit, qëndron kreu i Kuvendit, Gramoz Ruçi.
Ministri i Mbrojtjes Niko Peleshi njofton çeljen e stërvitjes më të madhe ushtarake që pret Shqipëria si aleate e NATO-s.
Në videon prezantuese të eventit sqarohet se “duke u mbështetur në suksesin e vitit të kaluar, “Defender Europe 21“ do të jetë gatishmëria dhe ndërveprueshmëria ndërmjet aleatëve e partnerëve, në përgatitjen e forcave tona të kundërveprojnë shpejt ndaj krizave, si dhe të kryejnë operacione të mëdha luftimi, nëse u kërkohet”.
Stërvitja do të ushtrojë aftësinë e Ushtrisë Amerikane në Evropë dhe Afrikë për të shërbyer si Komandë e Bashkuar e Komponentit të Forcës Tokësore, dhe si partner i sigurisë në rajonet me rëndësi strategjike të Ballkanit dhe të Detit të Zi, ndërsa mbështet aktivitetet në Evropën Veriore dhe Afrikë. Kritike për këtë ndërrmarrje është strategjia e rreptë për parandalimin e COVID-it dhe ajo e mjekimit, e zbatuar nga SHBA-ja dhe vendet pjesëmarrëse. Stërvitje si “Europe Defender 21“, dëshmojnë që përkushtimi i SHBA-së ndaj NATO-s është maksimal dhe se aleatët dhe partnerët e NATO-s qëndrojnë të fortë së bashku.
