Muaji janar që sapo ka nisur, pritet të jetë vendimtar për presidentin Ilir Meta. Më 9 qershor 2021, Kuvendi i Shqipërisë votoi me plot 104 vota në favor të shkarkimit të presidentit Meta nga detyra, për shkak se për socialistët ai ka kryer shkelje të rënda të Kushtetutës dhe se sipas Partisë Socialiste, largimi i tij para kohe nga posti i të parit të shtetit ka lindur si një nevojë për të çliruar Presidencën nga një pengmarrje.
Për rrjedhojë vendimi i Parlamentit i kaloi për shqyrtim Gjykatës Kushtetuese. Kjo e fundit do të mblidhet më 18 janar, ndërsa do të shqyrtojë vendimin e Kuvendit për shkarkimin e Metës, për shkeljen e 20 neneve të Kushtetutës, provokimin e cenimit të marrëdhënieve me SHBA, cenim të sigurisë publike, thirrje për veprime të dhunshme etj.
Presidenti humb balancat në Gjykatë
Por që presidenti Ilir Meta të shkarkohet nga detyra, duhet të votojnë pro vendimit të Kuvendit të Shqipërisë të paktën 5 anëtarë të Gjykatës Kushtetuese. Gjykata ka aktualisht 7 anëtarë nga 9 që duhet të kishte dhe gazeta ka mësua se kreu i shtetit nuk ka më ndikim në Kushtetuese.
Sipas informacioneve, mësohet se 5 nga 7 anëtarët e Gjykatës Kushtetuese pritet të votojnë pro shkarkimit të Ilir Metës si President i Republikës, ndërkohë që dy emrat e tjerë të kësaj trupe që mund të rreshtohet pro kreut të shtetit janë Sonila Bejtja dhe Marsida Xhaferllari.
Këto dy të fundit kanë votuar në linjën e Metës në shumicën e rasteve vendimtare në Gjykatën Kushtetuese, duke bërë dhe konfirmuar në një farë mënyre se ato janë 2 besniket e presidentit në këtë institucion. Pra, në rast se shqyrtimi i dosjes së Metës mbyllet këtë muaj, gjasat janë që ai të shkarkohet si president me plot 5 vota pro dhe 2 kundër.
Pas shkarkimit Meta merr drejtimin e LSI
Megjithatë, Ilir Meta duket se është përgatitur dhe është i vetëdijshëm që do të shkarkohet si President i Shqipërisë nga Gjykata Kushtetuese. Gazeta ka mësuar se zoti Meta po punon prej disa ditësh në prapavijë, duke bërë gati terrenin që të rikthehet në krye të Lëvizjes Socialiste për Integrim, parti që ai vetë e ka krijuar.
Madje një lajm të kësaj natyre e paralajmëroi në fund të dhjetorit që lamë pas edhe Monika Kryemadhi, ku gjatë një aktiviteti i të organizuar për festat e fundvitit nga LSI, zbuloi se Ilir Meta do të marrë për pak muaj drejtimin e Lëvizjes Socialiste për Integrim. Sipas Kryemadhit, Metës i mungon mundësia për të ndryshuar realitetin e ndotur të moçalit politik dhe për rrjedhojë ai do të rikthehet në krye të LSI.
“Jam e bindur se brenda shumë pak muajsh, ai që krijoi LSI do të kthehet te ju. Edhe ai mezi pret që t’ju vijë”, deklaroi Kryemadhi. Mirëpo kjo deklaratë dhe lëvizjet e Metës, tregojnë qartë se ky i fundit është në dijeni që Kushtetuesja do ta shkarkojë, kështu që nuk ka humbur kohë dhe ka nisur të pjekë kushtet që të katapultohet sërish në politikë përmes Lëvizjes Socialiste për Integrim.
Por me rikthimin në krye të LSI, Ilir Meta pritet që t’i bashkohet edhe “Foltores” së Berishës, çka do të thotë se ai, sëbashku me ish-kryeministrin do të jenë bashkë kundër amerikanëve. Pra, sipas informacioneve Meta dhe Berisha do të bëhen bashkë e madje do të dublojnë opozitën e Lulzim Bashës, ndërkohë që do të forcojnë grupin antiamerikan dhe pse jo do t’i tregojnë forcën SHBA-ve.
