Protesta e së shtunës e opozitës pritet të ketë tensione. Dalja e përgjimeve nga gazeta gjermane “Bild” dy ditë më parë e ka ndezur situatën. Gazeta e tha dje se pas këtyre përgjimeve fshihet opozita, për të bërë gati terrenin e dhunës dhe kaosit. Dhe realisht kështu ka ndodhur.
Gazeta ka mësuar se dje krerët e degëve janë udhëzuar të marrin masa për protestën e së shtunës, ku ju është bërë e ditur se më 8 qershor Rama duhet të rrëzohet patjetër.
Sipas burimeve, degët dhe sidomos mbështetësit e Berishës, janë mobilizuar për përplasje dhe tensione, duke përdorur si argument përgjimet e nxjerra nga media gjermane. Ajo që konfirmon qartë se do ketë përplasje të forta, është një reagim i ish-kryeministrit Sali Berisha. Duke reaguar në rrjetet sociale, ai ka publikuar një foto me titull: “Luftë mafias”. Fotoja është shoqëruar me dixhiturën: “Tik tak, tik tak e shtuna, cunami po vjen”.
Po ashtu, përmes një tjetër statusi, ai ka thënë se Rama duhet të rrëzohet me çdo çmim. “Miq, publikimet e “Bild” dhe akti i djeshëm i Edvin Kristaq Droga provuan para çdo shqiptari dhe qytetari të lirë në botë apo miku të Shqipërisë, drejtësinë e vendimeve dhe misionit të opozitës shqiptare për përmbysjen me çdo kusht dhe me çdo çmim të monstrës se pluralizmit, kreut të narkoshtetit dhe regjimin e tij të kakistokracisë”, tha ai dje.
Sinjalet e dhunës
Deklaratat e Berishës janë të qarta se po kërkohet dhunë dhe përplasje. Edhe të mërkurën përfaqësues të LSI deklaruan se e shtuna do sjellë fundin e Ramës. Pra sinjalet janë të qarta se PD e LSI e kanë ndarë mendjen për të futur në kaos vendin. Deri më 2 qershor kishte sinjale se do kishim një marrëveshje mes kryeministrit Edi Rama dhe kreut të opozitës Lulzim Basha.
Por nuk u arrit asnjë tryezë dialogu, pasi këtë herë presionet e Berishës dhe Kryemadhit ndaj Bashës ishin shumë të forta. Berisha ja kishte bërë të qartë Bashës se nëse nuk rrëzohet Rama deri më 2 qershor, atëherë nuk ka më arsye që të protestohet në mënyrë paqësore. Për këtë arsye pritet që tani të ketë protesta të vazhdueshme me dhunë dhe tensione. Protesta e së dielës i dha sinjalet, ndërsa deklaratat e djeshme të Berishës e tregojnë qartë se nuk do jetë aspak një ditë e qetë e shtuna.
Burime të gazetës thanë se njerëzit e Berishës në bazë kanë shtuar presionet ndaj krerëve të degëve, duke kërkuar që të marrin fund shëtitje nëpër rrugët e Tiranës. Sipas tyre, po tallen qytetarët brenda e jashtë vendit dhe për këtë arsye tani duhet vetëm destabilizim. Pas publikimit të përgjimeve të gjitha degët janë informuar që të shtunën të dërgojnë sa më shumë njerëz, duke ja u bërë të qartë se tani Rama nuk ka më asnjë arsye të qëndrojë në krye të qeverisë.
Skenarët e Berishës dhe Metës
E gjithë kjo që po ndodh me opozitën duket se është skenar i Sali Berishës, i cili po mbështetet dhe nga presidenti Ilir Meta. Berisha ishte ai që hodhi idenë e djegies së mandateve, ndërsa në çdo studio televizive dhe postim në rrjetet sociale bën thirrje për dhunë dhe kaos. Sinjalet janë se tani e ka marrë ai në dorë situatën, pasi Basha mund të thuhet se dështoi ta largonte qeverinë.
Edhe në protestat ku ka pasur dhunë, dyshohet se kanë qenë të përfshirë mbështetës të Berishës. Por në prapavijë po luan dhe presidenti Ilir Meta. Ky i fundit kishte mundësinë të ulte në tryezë palët, por nuk e bëri. Arsyeja dihet, pasi gruaja e tij është anëtare e opozitës dhe dukej qartë se është i njëanshëm. Por presidenti nuk ka qëndruar korrekt dhe me deklaratat, duke sulmuar dhe anatemuar mazhorancën sa herë i jepet rasti.
Madje dhe për Bajram dhe kur ka reaguar për ditë të caktuar ka sulmuar mazhorancën. Edhe për tërmetin në Korçë në një farë mënyre akuzonte qeverinë. Ajo që e tregon qartë se kemi një aleancë Meta-Berisha është dhe një foto e pak ditëve më parë, ku ata hanin drekë bashkë.
Lidhja e tyre është forcuar, duke qenë se 30 qershori po afron dhe nuk ka më kohë. Për këtë arsye Berisha ka ndezur fitilat në degë me shpresën se do destabilizohet vendi. Të shohim çfarë do ndodhë më 8 qershor, por sinjalet janë se do ketë tensione dhe si justifikim do jetë artikulli i “Bild”.
Kliti Topalli
