Shtetet e Bashkuara të Amerikës duken të vendosura për të dërguar pas hekurave politikanët e korruptuar në Shqipëri dhe jo vetëm.
Presidenti Joe Biden e shpalli prioritet luftën antikorrupsion në shtetet partnere, përfshirë dhe Shqipërinë, ndërkohë që çdo ditë dalin detaje nga plani amerikan. Gazeta një ditë më parë tregoi e si Departamenti i Drejtësisë do të dërgojë një zyrtar special në Ballkan, i cili do të ketë në fokus mbikëqyrjen e luftës kundër korrupsionit, por kjo nuk do të jetë lëvizja e vetme.
SHBA do të dërgojë në të gjitha shtet aleate ekspertë që do të ndihmojnë në procesin hetimor të prokurorive, në rastin e Shqipërisë pranë SPAK. Interesant është fakti se amerikanët do të asistojnë në gjurmimin e parave të korrupsionit.
“Departamenti i Shtetit dhe i Drejtësisë synojnë të dërgojnë ekspertë me përvojë të qeverisë amerikane kundër korrupsionit për të përmbushur nevojat emergjente dhe për të ndërtuar kapacitete në vendet partnere për të hetuar, ndjekur penalisht dhe gjykuar korrupsionin.
Ky fond do të lehtësojë gjithashtu koordinimin ndërmjet vendeve për rastet, do të ndihmojë në gjurmimin dhe rikuperimin e të ardhurave nga korrupsioni dhe do të mbështesë reformat e mëtejshme ligjore dhe institucionale”, thuhet në draftin e publikuar nga DASH në kuadër të Samitit për Demokraci.
Më tej bëhet me dije se do të vendoset dhe një koordinator që do të merret me organizmin e procesit të asistencës për luftën antikorrupsion. “Rritja e përpjekjeve kundër korrupsionit. Sekretari Blinken njoftoi më 9 dhjetor krijimin e një Koordinatori të Departamentit amerikan të Shtetit për Antikorrupsionin Global, i cili do të integrojë dhe rrisë luftën kundër korrupsionit në të gjitha aspektet e diplomacisë së SHBA dhe ndihmën e jashtme të Departamentit të Shtetit. Koordinatori, duke punuar ngushtë me partnerët ndërinstitucionalë dhe ndërkombëtarë, do të udhëheqë gjithashtu implementimin e Strategjisë së SHBA-së Kundër Korrupsionit nga Departamenti i Shtetit”, tha ai.
