Pas Sali Berishës, Prokuroria e Posaçme (SPAK) ka trokitur në derën e Ilir Metës. Ndonëse SPAK dhe vetë ish-presidenti e kanë mbajtur të fshehtë, duket se detajet po dalin.
Pak ditë më parë u zbulua se SPAK ka sekuestruar telefona dhe pajisje elektronike të Metës dhe Kryemadhit, por duket se nuk mbyllet me kaq. Meta dhe bashkëshortja e tij janë vënë nën hetim pasuror. Të paktën këtë ka pranuar Monika Kryemadhi.
Ajo ishte e ftuar në një emision televiziv pak kohë më parë dhe deklaroi se ndaj tyre ka nisur verifikimi i pasurisë. Për këtë zhvillim, analisti i njohur, Kastriot Aliaj paralajmëron në një shkrim për gazetën “SOT” se familjen e Metës e presin ditë të zeza. Ai ka zbuluar se të fshehtat nga pasuritë e Metës dhe personazhet e njohur që i pastrojnë paratë.
Ja analiza e plotë e Kastriot Aliajt për gazetën “SOT”:
Shqiptarët nuk mund të manipulohen më
“Pas një periudhe të gjatë heshtje, me pretekste nga më absurdet, shfaqet ish-presidenti Ilir Meta për të promovuar “ndershmërinë” e tij përpara shqiptarëve, duke bërë të pa diturin për arsenalin e krimit ekonomik. Pas Sali Berishës kanë nisur të rrotullohen mbrapsht, akrepat e orës së tij nga numri i madh i dosjeve në duart e SPAK dhe BKH. Shqiptarët nuk mund të manipulohen më, sepse e dinë më mirë se ai dhe kushdo politikan tjetër i sërës së tij, që politika e këtyre viteve, për fat të keq nuk mundi të shkruaj histori suksesi, sepse u mbulua nga krimi ,korrupsioni dhe hajdutëria.
Kjo panoramë e rrufianizmit politik, e modeluar nga krerët e politikës PD,PS dhe PL, ka bërë vend në ndërgjegjen e çdo shqiptari, si e keqja më e madhe e sistemit demokratik. Ajo kërkon një gjykim të thellë juridik nga organet e specializuara, për të ndarë shapin nga sheqeri, për pastrimin e politikes nga mbetjet e teknologjisë moniste. Mjegullnaja që krijoj propaganda pragmatiste populiste, e zhyti vendin në autokratizëm dhe allishverizëm, duke u kthyer në makth për shqiptarët, të cilët po dëgjojnë se çfarë drame është luajtur nga politika në kurriz të tyre.
Në “sitë” pasuria e Metës
Pas politikanit nekrofil të pandreqshëm Sali Berishës, ka hyrë në sitën e spektralizimit, pasuria marramendëse e familjes Meta-Kryemadhi, e marrë në mbrojtje nga banda e ngritur për këtë qëllim. Partia e Ilir Metës që u konvertua nga LSI në PL, u nis si një sekt politik brenda së majtës, e cila u shndërrua në faktor në kurriz të dy partive të mëdha, ku për pasojë kultivoj masivisht dhe ngriti në sistem korrupsionin dhe hajdutërinë.
Megjithëse PL nuk u bë drejtuese e vendit, kryetari i saj Ilir Meta edhe pa vënë brisk në faqe, mundi të promovohet në të gjitha detyrat e larta të shtetit. Duke spekuluar me besueshmërinë gjatë kërcimeve në të dy krahët e politikës, ai nuk punoj kurrë për interesat e ndërtimit të demokracisë, por vetëm për pasurimin e familjes së tij. Historitë e partive minore në disa vende me demokraci moderne, kanë treguar se edhe pa shumë autoritet, kanë luajtur role ekuilibruese në evitimin e turbulencave politike. Shembuj të tillë gjejmë në SHBA, Gjermani e në disa vende të tjera, tek reformistët, socialistët, partitë e gjelbra, të cilat ndikojnë në zgjedhje pa shkaktuar trazira dhe konfuzion politik.
Njerëzit që pastrojnë pasuritë e Metës
Ndërsa Ilir Meta në bashkëpunim me Sali Berishën, krijoj marrëdhënie mafioze, duke e shndërruar partinë në korporatë të abuzivizmit korruptiv. Faktet kokëfortë të kësaj mënxyrë në kurriz të shqiptarëve, flasin për lobime, afera ‘CEZ-DIA’ , shërbime estetike, biznese, vila tek gjiri i Lalzit me 13 banjo për njerëz, qen e mace, vila tek Kodra e Diellit, marrja e parave ruse, konvertimi në paund në Angli i floririt të vjedhur, me të cilin u paguan studimet e fëmijëve, etj. Jo më kot znj. Kryemadhi para disa vitesh do të deklaronte në një intervistë televizive, se ne do shkojmë të banojmë në të ardhmen në Angli. Por dora e Ilir Metës u shtri edhe mbi biznesin e pllakave të malit të Tomorrit, si dhe në kontrollin e mermerit të grykës së Devrisë.
Ilir Meta duhet të flasë edhe për transportet e dyshimta me anijen e tij, nga Amerika Latine në Evropë. Në bandën e mbulimit dhe mbrojtjes së pasurive marramendëse të familjes Meta, bëjnë pjesë biznesmenë dhe pseudobiznesmenë, ndër ta edhe artistë të humorit si Besart Kallaku, i cili vitet e fundi po performon si këngëtar. Shqiptarët për vite të tëra kanë ndjekur me simpati humorin e tij, i cili na qenka ushqyer nga pasuritë e Ilir Metës.
Këto burime e kanë bërë atë pronar restorantesh, lokalesh, apartamente, makina luksoze, të cilat kanë vënë punë organet e drejtësisë. Nga hetimet e deritanishme numërohen mbi 20 biznese, ku brenda tyre del edhe patrioti i tij nga Potomi Irfan Hysenbelliu, i cili u ankua pse u godit nga Edi Rama me ndërkombëtarët, për t’i prerë fijet me Ilir Metën. Por lista e gjate e marrëzive te familjes Meta, vazhdon me pseudobiznesmenin Leart Kasaj, i cili me parat e vëna ne dizpozicion nga znj. Kryemadhi, si dhe shoqes së saj Elona Guri, kanë blerë gati gjysmën e kompleksit Delijorgji. Ky biznesmen i sajuar dhe i maskuar na del me një kartel kompanish fantazëm, pa bilance llogarie por një mbulesë e dyshuar e parave të pista.
Biznesmenë, oborrtarë dhe punonjës të mediave
Nga kjo mori biznese korruptive, që përbëjnë profilin mafioz të kësaj politike, nuk kanë mbetur pa përfituar oborrtarë dhe punonjës të mediave, drejtori i TV Syri Net Cim Peka, në shërbim të idhullit të tij Sali Berisha, që edhe pse i mbyllur në “kafaz” nuk i ndahet propagandës së tij. Por edhe godina e PL dikur e LSI në bllok, ku gatuhen planet djallëzore të rrufjanit Ilir Meta, na del pasuri e hedhur në emër të Muharrem Berishës, anëtar edhe ky i bandës së krimit ekonomik, për të cilin flitet se ka qenë inspektor pyjesh.
Se si kanë dalë dhe nga kanë dalë këto burime, qe ky person të jetë pronar i saj, ku është atashuar PL, vetëm organet kompetente të drejtësisë do t’i japin përgjigje, ashtu si shumë çështjeve të tjera të krimit ekonomik. Për shërbimet që i ka bërë Ilirit, por edhe si shok i dikurshëm i sportit të peshëngritjes, nuk mund të mos dekorohej prej tij, me titullin “Mjeshtër i Madh”. Shkatërrimi i këtyre bandave të krimit ekonomik, është një thirrje jo vetëm për organet e drejtësisë, por për të gjithë faktorët brenda dhe jashtë politikës, për t’i dhënë frymëmarrje ndërtimit të shoqërisë demokratike.”
