Juristi Romeo Kara në një intervistë për gazetën “SOT”, ka folur mbi aktualitetin politik dhe reformën në drejtësi.
Duke u ndalur te procesi i shkarkimit të presidentit Meta, ai u shpreh besimplotë se Gjykata Kushtetuese do vulosë shkarkimin e tij, ndërsa u shpreh se më pas do të jetë radha e drejtësisë për të vepruar.
Kara deklaroi se provat kundër presidentit janë të gatshme, ndërsa përmendi vetëm 5 emra, që sipas tij kanë dëshmuar se Meta është i përfshirë në afera, sidomos në rastin CEZ-DIA.
Ai u ndal dhe te ish-kryeministri Berisha, i cili sipas tij u njollos nga SHBA. Po ashtu Kara deklaroi se dhe për të do të ketë veprime konkrete nga drejtësia.
-Zoti Kara, politika tani duket se po shkon drejt pushimeve verore, por sërish kemi një klimë të tensionuar. Parlamenti shkarkoi presidentin. Mendoni se Kushtetuesja do e shkarkojë përfundimisht nga detyra?
Sipas dispozitave kushtetuese, duhet patjetër që Gjykata Kushtetuese, të vërtetojë fajësinë e presidentit, në mënyrë që të deklarojë shkarkimin e tij. A do të arrijë kjo gjykatë në këtë konkluzion? Gjasat janë për po, por gjithsesi duhet të jemi të duruar për mësuar se si do të mbyllet ky kapitull. Ajo që unë kam konstatuar është se:
Presidenti Meta ka shkelur hapur dhe në mënyrë të përsëritur Kushtetutën dhe ligjet, duke e nxjerrë tërësisht presidentin e vendit nga roli i përfaqësuesit të unitetit të popullit, si dhe duke e kthyer atë në faktor destabiliteti deri në thirrjet e hapura antiligjore për rrëmbimin e armëve dhe rrëzimin me dhunë të rendit kushtetues.
Nëse Presidenti i Shqipërisë betohet ndër të tjera se:”…do t’i shërbejë interesit të përgjithshëm dhe përparimit të popullit…”, presidenti Meta e cenoi si asnjë tjetër këtë interes duke atakuar si një rrugaç i çakërdisur ambasadoren e SHBA, si dhe vetë SHBA.
Pavarësisht se Komisioni Hetimor parlamentar dhe vetë Parlamenti nuk mund ta detyrojnë prokurorinë, ajo vetë kryesisht mund të fillojë një proces penal kundër Presidentit nëse e sheh të arsyeshme. Sidoqoftë jemi përpara një procesi unik, atë të shkarkimit për herë të parë nga detyra të një presidenti shqiptar. Ky do të ishte fundi i merituar, i një presidenti të zgjedhur tërësisht, si produkt i një pazari të hapur politik.
Bashkë me Metën, po bie edhe pazari që solli Metën në krye të shtetit. Këtij establishmenti politik, i ka rënë e drejta morale të zgjedhë presidentin pasardhës, prandaj duhet konsideruar zgjedhja e tij direkt nga populli. Hap më të mirë për rikthimin e demokracisë direkte, nuk do të kishte.
-Po ju pyes drejtpërdrejt, sa i rrezikuar është Ilir Meta nga burgu? Është ndër të paktët persona që gjithë jetën e ka kaluar në politikë dhe mund të themi se renditet mes politikanëve më të pasur.
Absolutisht që po. Mjafton afera DIA-CEZ që ai ta kalojë një pjesë të mirë të jetës që i ka ngelur, pas dyerve të burgut. Persona të ndryshëm, në kohë e vende të ndryshme deklarojnë dhe pohojnë të njëjtën gjë, fajësinë e tij. Dritan Prifti (2010), Jozef Hejsek (2014), Elvis Mataj (2014), Vojsava Ismailaj (2016) dhe Romeo Kara (2017), pohojnë me fakte se Meta është tërësisht i përfshirë në këtë aferë qindra milionë euroshe duke efektuar negativisht vendimet e ERE-s lidhur me miratimin e tarifave të energjisë që shitej nga KESH-i tek CEZ-i. Mjafton vetëm një verifikim i burimit të pasurive të tij të panumërta për ta parë Metën përjetësisht në burg. Nuk po flas për rihapjen e proceseve të tjera penale, të cilat momentalisht qëndrojnë të mbyllura.
-Si e shihni pozitën e Berishës? Ju ishit të parët që e akuzuat drejtpërdrejt dhe keni bërë padi penale ndaj tij. Po ai është i rrezikuar nga burgu dhe sekuestrimi i pasurive?
Falë USA-s, sot Berisha qëndron përpara popullit të cilin ai e mashtroi dhe shpërdoroi këto 30 vite si dhe përpara opinionit ndërkombëtar, tërësisht i zhvlerësuar moralisht si njeri dhe figurë politike, tashmë të denjë vetëm në malin e turpit. Portret më të zi se sa i është bërë Berishës nga State Department, zor se do të shohim më pas. Patjetër që Berisha do ta marrë atë çfarë i takon dhe të cilës ai ia ka bërë me këmbëngulje hyzmetin prej 30 vitesh. Berisha kompromentoi rëndë përpara popullit shqiptar sistemin demokratik dhe garantet e tij që janë USA-t. Populli shqiptar akoma nuk e ka pasur fatin të jetojë në një shtet të së drejtës dhe demokratik dhe e gjitha kjo falë Berishës.
Berisha është një frymë dhe sistem autokratik, kleptokratik dhe antihuman dhe si i tillë ai përfshin çdo pushtetar që ka punuar si ai edhe pse jo pjesë e partisë së tij. Berishizmi shtrihet si praktikë kleptokratike në të gjitha partitë parlamentare pa përjashtim dhe është siguruar nga një Kod Zgjedhor antidemokratik dhe sistem drejtësie të kontrolluar prej tij.
Tashmë po shohim qartë se, nuk është pataksur vetëm Berisha, por i gjithë establishmenti politik. Fundi i Berishës sigurisht që do të jetë burgu dhe pasuritë e tij do t’i kthehen këtij populli. Nuk mund të vendoset demokracia në Shqipëri pa u dënuar Berisha, i cili po e mban peng këtë proces. Berisha do të bëhet patjetër edhe një shembull kuptimplotë, për çdo pushtetar, që në të ardhmen do të joshet drejt abuzivizmit të pushtetit.
-Pse Berisha kërkon të marrë kreun e PD, duke kërcënuar e dërguar mesazhe të koduara?
Berisha gjendet tërësisht i pashpresë dhe tashmë do të kërkojë të kapet edhe pas fijeve të barit. Dihet që ai e kontrollon PD-në deri në ekstrem, por ky kontroll dhe ky përdorim që ai po i bën PD-së, thjesht do të dëmtojnë më shumë PD-në. PD duhet të vendosë: të bëhet terror për Berishën, apo ta lërë atë të vetëm në fatin e tij të paracaktuar tashmë. Është tërësisht e kotë shpresa e Berishës se duke rrezikuar stabilitetin politik me anë të PD-së, ai do t’i shpëtojë fatit të tij. Nëse Berisha është gjigant për disa trushpëlarë, për botën në tërësi ai është vetëm një politikan tërësisht i zhvlerësuar dhe i pashpresë.
-A ka prova SHBA kundër tij, pasi Berisha pretendon se jo?
Nuk kam njohur politikan më gënjeshtar se Berisha. Sigurisht kur atij i intereson, ai nuk njeh jo më provat, por as baxhanakun, familjarët apo veten e tij. Si mundet USA-t të lajthisin kaq shumë sa të prononcohen pa prova të mbështetura në fakte përkundrejt Berishës. Berisha ka deklaruar disa herë së fundmi se, përgjatë këtyre 30 viteve askush nuk e ka akuzuar atë për korrupsion.
Ju jeni dëshmitarë se vetëm unë si person e kam akuzuar atë dy herë për korrupsion duke e kallëzuar në prokurori në 31 mars 2017 dhe 18 tetor 2017 për aferën e privatizimit të CEZ-it dhe atë DIA-CEZ. Lidhur me aferën e privatizimit ai është thirrur për të dëshmuar edhe në Parlament, por me sa duket ai i “paska harruar” këto. Realiteti i bëmave të korrupsionit berishian është e pamundur të fshihet dhe të mohohet. Tashmë duhet të dëgjojmë vetëm drejtësinë dhe jo përrallat e Berishës.
-Si jurist në profesion, nga duhet të nisë SPAK hetimet në nivelin politik dhe sa e lehtë është që të sigurohen provat kundër tyre?
Unë jam për të zhvilluar një përballje totale me korrupsionin, duke analizuar çdo fakt apo provë të ofruar ashtu si edhe kryesisht. Prokurorët dhe hetuesit duhet të dalin në terren. Korrupsioni është dukuri e pushtetit, prandaj do të rekomandoja fillimin e hetimeve nga ish-pushtetarët dhe pushtetarët më të lartë në hierarkinë e pushtetit, të ndjekur nga bizneset e mëdha, të cilat janë bërë një me çdo pushtet, biles përfaqësojnë më së miri, unitetin e vërtetë të politikës së përçarë vetëm në dukje.
Sigurisht që duhet paraprakisht një pastrim i strukturave të policisë dhe përshpejtim të procesit të vetingut në drejtësi. Provat janë aty, pavarësisht se nuk është e lehtë edhe pse unë e konsideroj shumë të lehtë se sa mundohen ta servirin pesimistët kronikë. Nuk ka patriotizëm më të madh sot, se sa të zhvillosh me ashpërsi dhe sukses, luftën kundër armikut me të rrezikshëm të këtij vendi, politikanëve të korruptuar. Lufta kundër korrupsionit duhet konsideruar mision, jo punë.
