Tryeza e reformës zgjedhore duket se po i prish planet presidentit Ilir Meta për të nisur protestat kundër qeverisë. Gjatë nëntorit, presidenti bëri të ditur se do të zbresë në shesh për të nxitur qeverinë dhe Parlamentin që të rregullojnë kuadrin ligjor sa i takon referendumeve.
Plani i tij ishte që të niste revanshin në 8 dhjetor, por tërmeti i prishi axhendën. Por kreu i shtetit ka deklaruar disa herë se nuk është tërhequr nga kjo nismë, duke treguar se ka ende në plan që të zbresë në rrugë kundër Ramës.
Por diskutimet që po zhvillohen për reformën zgjedhore pritet që t’i rrëzojnë kauzën kreut të shtetit. Në takimin që u mbajt ditën e hënë u fol për një sërë çështjesh, ku mes tyre u diskutua edhe për referendumin. Ishte deputetja Rudina Hajdari njëherësh edhe bashkëkryetare e reformës zgjedhore, e cila në një dalje për media pas përfundimit të takimit bëri me dije çështja e referendumit është bërë tashmë pjesë e axhendës së tryezës. Sipas saj, kjo është një çështje me shumë rëndësi, duke shtuar se edhe ndryshimi i sistemit ka një rëndësi të madhe.
“Patëm një takim i cili ishte i suksesshëm. Ishte një takim që ramë dakord gjerësisht për kalendarin, për çështjet që do të shtrohen, metodologjinë dhe si do ecim përpara, pra afatet kohore dhe çështjet që do të trajtohen brenda afateve. Ajo që është e rëndësishme për mua si pjesë e opozitës në Parlament, asgjë nuk është kufizuar në trajtimin e sistemit zgjedhor. Gjithashtu është rënë dakord që të trajtohet çështja e referendumit, që është një gjë shumë e rëndësishme. Pastaj është rënë dakord që të trajtohet edhe vota e emigrantëve”, u shpreh Rudina Hajdari dy ditë më parë.
Por tashmë që Partia Demokratike dhe Partia Socialiste kanë futur në axhendën e diskutimeve edhe çështjen e referendumit, kanë prishur të gjitha planet që kishte presidenti Ilir Meta. Tashmë kreu i shtetit nuk ka asnjë kauzë për të cilën të dalë në rrugë kundër qeverisë dhe për të bërë thirrje për revolta popullore. Ishte propozimi i opozitës parlamentare që ndryshimi i sistemit zgjedhor dhe referendumi të përfshihen në kalendarin e punimeve për miratimin e reformës zgjedhore. Por ndonëse kreu i shtetit deklaroi pak kohë më parë se vetëm referendumi e zgjidh ngërçin politik që është krijuar, duket qartë që “mbrojtja e Republikës së Shqipërisë” po vjen nga tryeza e zgjedhores. Por pas kësaj “goditje” që mori presidenti Ilir Meta, pritet të shihet nëse do të arrijë të gjejë ndonjë “kauzë” tjetër për të zbritur në shesh kundër qeverisë dhe kryeministrit Edi Rama.
Qeveria teknike
Por deputetja Rudina Hajdari foli edhe ditën e djeshme për tryezën e reformës zgjedhore. Në një intervistë televizive, ajo tha se ndryshimi i sistemit zgjedhor është shumë i rëndësishëm, për ta bërë atë me lista të hapura në mënyrë që të nxiten qytetarët për të votuar. Sipas Hajdarit, Shqipërisë i duhet ndryshimi i sistemit dhe se shqiptarët nuk kanë nevojë për një qeveri teknike. “Nuk ka ngelur shumë kohë, 15 marsi është shumë afër. Do jetë datë e vështirë për tu kapur nëse do parashtrohen të gjitha temat.
Më e rëndësishme ngelet ndryshimi i sistemit zgjedhor. Afatet që janë dhënë në tryezë janë afate që do diskutohen ato tema. Në Komisionin e Reformës Zgjedhore kemi pasur 2-3 propozime konkrete që do diskutohen dhe në këshillin politik. Roli im është për të çuar këtë axhendë përpara. Unë do luftoj deri në fund që ky sistem të ndryshojë dhe të ketë një shtytje për qytetarët shqiptarë që të shkojnë të votojnë. Nuk besoj se shqiptarët janë në nevojë të një qeverie teknike apo të një qeverie të përbashkët. Ne i kishim këto kushte në 2017 dhe më vonë PD nuk i pranoi ato zgjedhje”, deklaroi Hajdari.
