Prej disa ditësh, Partia Demokratike dhe disa media pranë saj, kanë nisur një sulm të egër ndaj prokurorit Gentian Osmani.
Shkak për këtë është bërë fakti se ai është prokurori që ka kërkuar arrestimin e “Babales” dhe kunatit të tij, për montimin e audio-përgjimit ku pretendohej se fliste vëllai i ministrit të Brendshëm, Agron Xhafaj.
Ndërsa Oerd Bylykbashi e ka sulmuar pas publikimit të vendimit që mban firmën e këtij të fundit, për kalimin për kompetencë në Prokurorinë e Elbasanit, të dosjes që lidhet me ngjarjen në hyrje të Tregut Ushqimor të Elbasanit në shtator 2017.
“Prokuroria e Krimeve te Renda paska thënë sot se nuk ka kompetence te hetoje krimin e rende te nje prej bandave me te rrezikshme te Elbasanit, e cila në shtator të vitit 2017, pothuaj vrau punonjës policie në një ngjarje të ndodhur në hyrje të Tregut Ushqimor të Elbasanit. Policia e fshehu ate ngjarje derisa u denoncua publikisht nga Kryetari i PD Lulzim Basha.
Prokurori Gentian Osmani, me anë të një shkrese zyrtare të drejtuar Gjykatës së Shkallës së Parë për Krimet e Rënda, ka njoftuar se nuk ka kompetencë për të hetuar kete bande. Por ama, nga ana tjeter, Prokuroria e Krimeve te renda eshte e gjitha e angazhuar per te shpetuar te denuarin per trafik droge Agron “Geron” Xhafa dhe trafikante e kriminele te lidhur me qeverisjen e Edi Rames permes hetimit te ‘provave’ per kallzim te rreme te fabrikuara ne zyren e Fatmir Xhafes.
I njejti prokuror qe shpall sot moskompetence per hetimin e krimeve te renda te bandave te Elbasanit, keqperdor Prokurorine e Krimeve te Renda per te hetuar, teresisht jashte kompetences se Krimeve te Renda, kallzimin qe ka bere narkotrafikanti Agron Xhafaj per ‘kallezim te rreme’ qe nuk eshte krim i rende. Ky eshte produkti i reformes Rama-Xhafaj, nje prokurori qe vepron me telekomanden e pushtetit”, shprehet Bylykbashi.
Pë rata që nuk e mbajnë mend, Gentian Osmani ishte në grupin e prokurorëve që kërkoi arrestimin e Saimir Tahirit muaj më parë.
Atëhere ai, bashkë me dy kolegët e vet, u kthye në “heroin” e PD-së.
Sot që nuk i vjen pas avazit PD-së, sipas demokratëve, ai është një i shitur tek Rama.(TemA)
