“Llafeve pa fund dhe pa kuptim të folësve u gjeti një përmbledhje ish-kryeministri Sali Berisha që përcolli mesazhin kryesor në një prononcim për mediat: “Kjo protestë varrosi narkozgjedhjet e 25 qershorit”, tha ai. Nëse është kështu, atëherë për opozitën shqiptare Parlamenti aktual është jolegjitim dhe çdo pjesëmarrje e saj në të në vijim është thjesht e pakuptimtë. Nëse kjo deklaratë apo ky përcaktim do të adoptohet si qëndrim zyrtar politik nga PD-ja, atëherë asnjë mandat deputeti nuk duhet të vazhdojë të mbetet në këtë parti që sot shpall mosnjohjen e zgjedhjeve të cilat i menaxhoi vetë…”
Kështu e komenton portali ResPublica, protestën e fundit të opozitës në Tiranë.
Analiza flet për “interesat e vërteta” të cilat janë ende të errëta.
“Është një situatë absurd ku retorika e revolucionit dixhital mjegullon interesat e vërteta që ndoshta brenda pak kohësh do të zbardhen edhe për opinionin publik. Dhe ndoshta në atë moment do të shikohet më mirë nëse ai që sot drejtonte protestën, z. Basha, ishte aty për të ngritur popullin, apo për të recituar pjesën e vet përpara se të ndahet nga kjo politikë ku ai vetë nuk ndihet komod dhe ku e detyrojnë rrethanat” – shkruan portali me prirje të djathta,
Ja si portretizohet kreu formal i PD në këtë analizë:
“Në këtë kuptim, kemi të bëjmë me një kryetar opozite të mbërthyer në intriga korridoresh dhe diplomatësh, i cili e ka më të sigurtë rrugën drejt pushtetit me marrëveshjet që i ofrohen papushim, sesa duke ndërmarrë veprime mirëfilli opozitare. Por që është i shtrënguar të luajë vokalistin e të inatosurve dhe të pakënaqurve mes të cilëve siç e kemi vënë re nuk bën pjesë asnjë prej deputetëve që ai vendosi me dorën e tij në listën e atyre zgjedhjeve që sot detyrohet t’i kundërshtojë.
Kjo është fatkeqësi më vete, por siç mund ta dimë, z. Basha pak i bën për interesin publik dhe këtë e tregoi me marrëveshjen e 17 majit, me të cilën siç tha ai shmangu luftën civile. Një luftë e cila në fakt është një luftë klanesh prej të cilave ai po fiton thjesht dhe vetëm falë një koninukture që favorizon rotacionin e brezave dhe prishjen e një ekuilibri që kulmoi me vitin 2009. Një koninukturë që zbulon edhe gënjeshtrën e z. Basha, ndaj të cilit sot mund t’i bëhet një pyetje:
A keni interes Ju z. Basha që Edi Rama të largohet nga pushteti? Pra të ikë nga pushteti personi që ju mundësoi hipotekimin në masën 80% të PD-së kur ende situata është e paqartë?/ dita
