Partia për Drejtësi, Integrim dhe Unitet rrezikon të shkrihet si parti. Edhe pse dikur Shpëtim Idrizi kishte grup parlamentar, sot nuk ka asnjë deputet në Parlament, madje as vetë nuk arriti të bëhej.
Por në zgjedhjet e 25 prillit pritet të marrë goditje akoma dhe më të fortë, pasi emrat që siguronin votat në PDIU janë larguar. Në Elbasan kjo parti mori 2 mandate deputeti në 2017 dhe kjo falë Aqif Rakipit. Sipas informacioneve ky i fundit e ka braktisur PDIU dhe është bashkuar me PS. Edhe pse iu hoq mandati i deputetit për shkak të dekriminalizimit, Rakipi pritet të rikandidojë, pasi u penalizua thjesht për mosdeklarim të saktë të të dhënave.
Emër tjetër që përfaqëson Elbasanin nga PDIU është Elena Xhina. Edhe kjo e fundit pritet që të bashkohet me PS zyrtarisht, pasi realisht ajo ka bashkuar votat me PS në Parlament. Tjetër emër është Reme Lala e Dibrës, e cila po ashtu është me PS dhe pritet rikandidimi nga radhët e kësaj partie. Pra të gjithë deputetët që dolën nga zgjedhjet e 2017 braktisën Idrizin dhe kaluan me PS.
Por gazeta ka mësuar se nuk përjashtohet edhe largimi i Mesila Dodës. Nëse PD vendos ta kandidojë në zgjedhjet e 25 prillit, pritet që ajo të bashkohet me ekipin e Bashës. Madje pak kohë më parë në një intervistë Doda e paralajmëroi një gjë të tillë. “Nuk është më çështje individuale, PD mbetet partia që kam qenë 20 vjeç dhe nuk kam thënë kurrë që s’do jem kurrë pjesë e të djathtëve apo demokratëve. Sigurisht që ndihem shumë afër.
Nuk ka asnjë rëndësi as emri i Mesilës dhe as ndonjë emër tjetër. Çështja është të bashkojmë forcat dhe të arrijmë një rezultat që të ketë mundësi të sjellë një Shqipëri normale”, tha Doda. Nuk duhet harruar se PDIU e braktisën dhe emra të tjerë me rëndësi në pushtetin vendor dhe në drejtori. Një ndër ta ishte Vjollca Braho, e cila për shumë vite ishte në krye të ISSH. Tahir Muhedini po ashtu nuk është parë më në krah të Idrizit. Nuk duhet harruar Dashamir Tahiri, i cili u largua që në 2015 kur Idrizi shkoi me PS. Ai kaloi fillimisht me PD. Por ai pritet t’i hapë punë kreut të PDIU, pasi do të kandidojë për Bindjen Demokratike në Vlorë. Tahiri pritet të rrëmbejë votat e çamëve duke fundosur PDIU.
Bredhja pas pushtetit
Nëse marrim me radhë të gjithë karrierën e Shpëtim Idrizit, ai ka ditur vetëm të udhëtojë nga njëra aleancë në tjetrën dhe ata që e kanë mbështetur i ka hedhur pas. Ishte Fatos Nano që e promovoi Idrizin. Ai e bëri drejtor Dogane dhe drejtor Tatimesh, por Idrizi pastaj u tregua mosmirënjohës. Kur Nano kërkoi firmën e tij për të kërkuar kandidimin për postin e presidentit, ai nuk ia dha.
Më pas Idrizi iku nga Nano e shkoi te Berisha. Pasi e djathta humbi zgjedhjet, Idrizi u tregua dinak dhe shkoi drejt pushtetit, pasi në 2015 firmosi aleancën me Ramën. Nga Rama më pas shkoi te Ilir Meta. Kur PD hyri në çadër, Idrizi u bashkua me LSI kundër Ramës dhe kjo solli pastaj paktin e 17 majit.
Më pas iku nga Meta dhe shkoi sërish te Rama. Tani Idrizi ka shkuar në opozitë te Lulzim Basha. Pra në vitet e fundi ai ka qenë si ato bletët që bredhin nga njëra lule në tjetrën vetëm për përfitime. Më pas nisi t’i hedhë grepat Erion Veliajt. Edhe pse kishte shkuar me PD, Idrizi këshilltarët e tij në Bashkinë e Tiranës i urdhëronte që të votonin pro vendimeve të kryebashkiakut. Por më pas edhe ata e braktisën duke ikur me PS. Nëse Basha nuk e fut në listat e PD në një vend të sigurt, Idrizi sërish pritet të mbetet jashtë Parlamentit, ndërsa PDIU nuk do ketë asnjë përfaqësues në Parlament.
