Përplasje e fortë mes kreut të Apple dhe atij të Facebook pasi i pari bëri deklaratë publike duke kërkuar të frenohet përdorimi i Facebook dhe i dyti u hakmor duke urdhëruar stafin qindra mijë vetësh të mos përdorin më telefona Apple.
Gjithçka nisi kur CEO i Apple, Tim Cook gjatë fjalës së tij në Samitin Time 100 që po zhvillohet në SHBA, i sensibilizoi të gjithë me një deklaratë që ka bërë.
Edhe pse ai drejton sot një prej kompanive më të mëdha të prodhimit të telefonave i ka këshilluar të pranishmit që ishin në këtë Samit, t’i përdorin sa më pak telefonat.
Më tej, ai ka vazhduar duke thënë: “Mjaft e përdorët Facebook kaq shumë.’’
Tim Cook fillimisht u sugjeroi përdoruesve të iPhone të përdorin mjetin e ri të Apple që organizon njoftimet në telefon.
Dhe më pas ka thënë: “Unë pyes veten: Vërtetë më duhen këto qindra mesazhe që marrë në ditë? Nuk është diçka që po i shton vlerë jetës sime. Njoftimet në telefon nuk të bëjnë njeri më të mirë. Sa herë që merrni në dorë telefonin ju hiqni sytë nga personi me të cilin po flisni. Dhe nëse më shumë shihni telefonin sesa personin që keni përballë, ju po bëni një gjë të gabuar. Ne kurrë nuk kemi dashur që njerëzit të mos e heqin telefonin nga dora. Nuk ka qenë objektivi ynë.”
Kujtojmë këtu se kjo nuk është hera e parë që Tim Cook e ka kritikuar rrjetin social për ndërhyrjet e shumta në privatësinë e përdoruesit.
Reagimi i Facebook ka qenë i shpejtë pasi pas deklaratave të shumta kundër kompanisë, mësohet se Zuckerberg u kërkoi punonjësve të mos përdorin më iPhone, por t’i ndërronin ata me celularë Android ku më i njohur në përdorim nga amerikanët është HTC.
