Dy ditë pas pezullimit të Rektorit, Mynyr Koni, dhe lajmit për zëvendësimin e tij 4 dekanët e fakulteteve të Universitetit të Tiranës në një deklaratë për media vlerësojnë vendimin e ministres së Arsimit, Besa Shahini. Në një deklaratë të përbashkët ata shprehen se vendimi është efiçent dhe zëvendësimi i tij do t’i hapë rrugë funksionimit pozitiv të Universitetit.
Dhori Kule: Situata që kanë ndodhur në Universitetin e Tiranës së fundi i futën drejt situatës ligjore të zgjidhjes. Ministrja e Arsimit përmes urdhrit ka konfirmuar pezullimin nga detyra të Rektorit të Universitetit të Tiranës dhe zëvendësimin me zëvendësrektorin Berndard Dostin. Dua ta vlerësoj këtë qëndrim në përputhje me ligjin dhe Kushtetutën. Situata e zgjidhjes së problemit është vonuar shumë. Pas një viti e gjysmë ligji më së fundi gjeti dritën jeshile, është respekt i ligjit të arsimit të lartë dhe Kushtetutës.
Ngërçi i krijuar në Universitetin e Tiranës nuk konfirmohet nga dëshirat e individëve brenda Universitetit dhe jashtë tij, ka institucione që i ka deleguar nëse ka apo jo shkelje, një prej tyre është MAS. Po kështu konstatime të shkeljes së ligjit janë bërë nga KLSH, gjykatat, Ministritë e tjera. U desh dhe protesta e studentëve që ti jepte impakt pozitiv zgjidhjes së këtij problemi. Deri më sot këtë e ka mbajtur peng politika. Komentet dhe intepretimet politike e kanë vonuar situatën dhe sot pas reagimit të studentëve.Ministrja e re e Arsimit nuk është mesa duket pjesë e sjelljes politike, është më e ftohtë në qëndrimin ndaj ligjit, arriti të marrë një vendim të tillë efiçent.
Vetëm administrata e Universitetit të Tiranës ka ezauruar mbi 80 lëvizje, mobilitete, ku në një Fakultet nga më të rëndësishmit ka pasur vetëm katër. Nuk i justifikon kush shkelje të tilla. Është shpërdorim i buxheteve që Europa ka dhënë në dispozicion të Universitetit. Kam konstatuar këto ditë që pothuajse të gjithë thonë se është jo vetëm vendim dhe qëndrim i mirëpritur por shumë i vonuar. Kam bindjen se situata do të shkojë jashtëzakonisht pozitivisht për funksionimin e Universitetit të Tiranës.
Pedagogët dhe studentët do të shohin se sa lehtë, sa efiçente, sa pozitive është që kur institucioni që mëson të tjerët sesi duhet të sillen do të fillojë të sillet vetë në mënyrë të ligjshme. Do t’ja ndjejnë shumë shpejt efektin pozitiv heqjes së ngarkesës dhe pengesës ligjore dhe këtij ngërçi që ka pasur UT në këtë periudhë dhe kam bindjen se do të kemi vetëm progres dhe angazhim për të kompensuar të gjithë këto deficensa që kemi pasur gjatë kësaj periudhe në një kohë sa më të shkurtër.
Dekani i Juridikut, Artan Hoxha, tha se gjatë viteve të fundit ka pasur një problem të rëndë të administrimit institucional, ku drejtimi i Universitetit të Tiranës ka qenë me një mentalitet të vjetër pa zbatuar kompetencat dhe deklarimet kushtetuse sesi funksionon institucioni i arsimit të lartë që është autonom.
Artan Hoxha: Autonomia është së brendshmi dhe së jashtmi. Ne funksionojmë me një ligj të ri të arsimit të lartë.Nga pikëpamjat e zbatimit të tyre kemi gjetur vështirësi të forta nga mentaliteti i vjetër i drejtimit të institucionit për të cilën ne kemi bërë luftën tonë të brendshme.Nuk është mirë për institucionet e arsimit të lartë të ketë ndërhyrje në administrimin e tyre apo edhe në vendimmarrje që kanë të bëjnë me pasojat që vinë për drejtimin por është shumë mirë që në zbatim të autonomisë nëse gjërat nuk funksionojnë si duhet e keqja apo paligjshmëria të ndërpritet.
Një nga mënyrat që ka parashikuar ligji për arsimin e lartë është që drejtuesi i një institucioni publik mund të pezullohet me urdhër të Ministrit kur Ministri konstaton shkelje të hapura të ligjit për arsimin e lartë apo legjislacionit në përgjithësi.Ka një vit e ca që është punuar për konstatimin e këtyre shkeljeve të pretenduara.Është e vonuar MAS në nxjerrjen e përfundimit final por më mirë vonë sesa kurrë.Ajo që Ministrja ka urdhëruar nuk shkel autonominë universitare por e garanton nga paligjshmëria dhe sjelljet e kundërligjshme.Autonomia nuk është dhënë si pavarësi në zbatimin e ligjit por garanci për zbatimin e ligjit.Zbatimi i ligjit është detyrim dhe jo vlerësim.
Duke renditur disa prej shkeljeve të ligjit të arsimit të lartë nga ana e Rektorit Koni, Hoxha tha se “janë marrë kompetenca të administratorëve, janë nënshkruar kontrata financiare nga Rektori i Universitetit që nuk ka asnjë kompetencë në drejtim ashtu siç nuk kemi as ne dekanët megjithëse na është kërkuar të zëvendësojmë administratorët tanë dhe se kemi bërë, janë marrë njerëz në punë në kundërshtim me ligjin, janë penguar funksione të rëndësishme të strukturave përbërëse të UT, janë kryer veprime të hapura në kundërshtim me ligjin sikurse raporti i fundit i MAS prej 100 faqesh tregon për veprimtarinë e Universitetit, në veçanti të Rektorit”.
