Ligji i ri për Akademinë e Shkencave duket se e ka ndarë në mes mazhorancën qeverisëse. Gazeta ka denoncuar se si deputeti Anastas Angjeli dhe disa kolegë të tij kanë çuar në Parlament një ligj mjaft problematik, sa i takon reformimit të Akademisë së Shkencave. Por përveç akademikut Artan Fuga, edhe anëtarët e Komisionit të Medias dhe Arsimit janë skeptikë mbi draftin e ri.
Dyshimet janë se përmes këtij ligji, anëtari i kësaj akademie Anastas Angjeli rrit dominimin e tij në arsimin e lartë shqiptarë. Kundër këtij projektligji ka dalë ish ministrja e Arsimit Lindita Nikolla, e cila u shpreh se ky projektligj i ri nuk sjell ndonjë risi, në krahasim me ligjin aktual.
“Përveç përcaktimit të misionit, tejkalimit të Gjykatës Kushtetuese, akademisë të të rinjve, do të doja edhe një herë të evidentoni cilat janë risitë e këtij projekt ligji dhe meqë në se prioritet mbetet reforma në sistemin e shkencave, cili është vendi i Akademisë së Shkencave në raport me akademinë aktualen në arkitekturën e re të shkencës. Ku qëndron reformimi i akademisë së re që sjell ky ligj në raport me ligjin aktual të shkencave”, tha Nikolla.
Po në të njëjtën linja ka qenë edhe Mirela Kumbaro, e cila u shpreh se nuk ka asnjë lidhje mes projektligjit të ri me atë aktual, duke shtuar se në ligjin e ri ka shumë mungesa dhe defekte. Sipas saj, projektligji i ri nuk sjell asnjë risi për kërkimin shkencor. “Në tre vitet fundit pas një nisme historike të qeverisë shqiptare dhe Ministrisë për një reformë të arsimit të lartë. Kemi sot një ligj të arsimit të lartë, i cili prek dhe fushën e kërkimit shkencor.
Projektligji që na vjen sot është një projektligj që ka të bëjë me rregullimin e një institucioni. Por nuk e shoh lidhjen organike të këtij projektligji me ligjin ekzistues të kërkimit shkencor, i vetmi që ekziston sot. Një ligj me shumë defekte dhe mangësi. As formalisht nuk e pashë një lidhje në këtë projektligj me ligjin e arsimit të lartë për pjesën e kërkimit shkencor.
Çfarë sjell ky ligj si reformues në fushën e kërkimit shkencor, roli që do të duhet të luaj “akademia e re” nga ky projektligj apo nga drafti final që do të dal pas debateve që kanë filluar dhe do të vazhdojnë. Anëtarët e asamblesë janë njëherësh edhe anëtarë të komisioneve , sepse në projektligj nuk është e qartë ndarja mes organit politik bërës që është asambleja dhe organeve ekzekutive”, tha Kumbaro.
Deputetët e mazhorancës në Komisionin e Mediave e pezulluan shqyrtimin e projektligjit për reformimin e Akademisë së Shkencave dhe shkak është bërë mungesa e parashikimit të buxhetit që do të kërkojë vënia ne zbatim e draftit të firmosur prej 14 parlamentarëve.
Reagon akademiku Artan Fuga
Akademiku Artan Fuga ka qenë mjaft skeptik sa i takon draftit të ri në kuadër të reformimit të akademisë. Përmes një reagimi, Fuga e akuzon ministren e Arsimit Besa Shahini për shkatërrimin e arsimit. Sipas tij, synimi i saj është zhdukja e Akademisë së Shkencave të Shqipërisë duke e integruar në një të vetme me akademinë e shkencave të Maqedonisë, Malit të Zi. “Ju as keni pranuar t’i dëgjoni zërat kundër asaj që akademia e pa reformuar po paraqet me grupin e drejtuar nga Skënder Gjinushi.
Roli i ministrisë tuaj në këtë grup ka qenë zero! Ndërkohë që ishit zyrtarisht pjesë e tij si ministri. Ju madje keni refuzuar të takoni akademik që kanë dashur t’ju paraqesin shqetësimet e mëdha për censurën e vendosur në akademi për zërin alternativ. Ju paskeni në plan të zhdukni akademinë e shkencave të Shqipërisë duke e integruar në një të vetme me akademinë e shkencave të Maqedonisë, Malit të Zi?
Sepse në të dy vendet akademikët shqiptarë atje kanë të drejtën e vendeve të tyre ? Këtë historia nuk do t’ua lejojë kurrë! As ne! Unë mendoj se e gjitha kjo është krejtësisht një dështim dhe vjen nga paaftësia juaj në këtë proces”, tha Fuga./ Elisjeda Kiko
