Pas Partisë Socialiste, duket se edhe Partia Demokratike po nis përgatitjet për zgjedhje të parakohshme. Kreu demokrat Lulzim Basha zhvilloi ditën e djeshme një mbledhje me Kolegjin e Kryetarëve, ku për disa orë u diskutuan mbi çështjet e brendshme politike. Burime të sigurta të gazetës pranë PD bënë me dije se kryeopozitari gjatë diskutimit e ka vënë theksin te riorganizimi dhe përgatitjen për një proces zgjedhor.
Po ashtu, burimet saktësuan se Basha ka kërkuar nga 61 drejtuesit e degëve në rrethe takime të shpeshta me qytetarët. “Duhet riorganizim, në të njëjtat kushte sikur të ishim në zgjedhje. Punoni me njerëzit, hapuni me partinë sikur të ishim me zgjedhje”, mësohet të jetë shprehur Basha. Në këtë kërkesë për krerët e degëve, Basha i ka dhënë një goditje të madhe ish kryeministrit Sali Berisha. Kryeopozitari ka kërkuar që në takimet derë më derë, krerët e degëve të informojnë qytetarët se PD nuk është më një parti si në kohën e Berishës, por është reformuar. Por duke iu referuar protestave, Basha i ka kaluar në plan të dytë, duke u shprehur se primare duhet të jetë zgjidhja e krizës politike. “Vendi është në një krizë të thellë shumëplanëshe dhe detyra e PD dhe opozitës është të angazhohet seriozisht për të qenë pranë njerëzve dhe për t’i hapur rrugë perspektivës evropiane të Shqipërisë. Opozita ka dhënë propozimet e veta për zgjidhjen e krizës në vend, që kalon përmes zgjedhjeve të njëkohshme parlamentare dhe lokale të parakohshme, me qeveri tranzitore që garanton standardet për zgjedhjet e lira dhe të ndershme”, ka shtuar më tej Basha. Por me këtë deklaratë, kreu demokrat duket se i ka dhënë një goditje të fortë presidentit Ilir Meta dhe ish-kryeministrit Sali Berisha, të cilët kërkojnë nga Basha rikthimin e protestave të dhunshme. Vetë ish-kryeministri dy ditë më parë u shpreh se opozita do përgatitet për rikthimin e skenarit opozitar me skenarë destabilizues. Por duket se thirrjet e Metës dhe Berishës nuk po dëgjohen më nga Basha, duke mos vepruar ashtu si ata i kërkojnë.
Koalicioni me LSI
Po ashtu, në mbledhjen e Kolegjit të Kryetarëve u diskutuan edhe për koalicionet me partitë opozitare. Sipas burimeve, disa kryetarë degësh e pyetën Bashën nëse do të ketë koalicion zyrtar me Lëvizjen Socialiste për Integrim. Por Basha mësohet të jetë shprehur se PD është një forcë e madhe dhe fituese dhe se çdo parti e di elektoratin e saj. Kjo përgjigje e kreut demokrat lë të nënkuptohet se nuk do të ketë koalicion zyrtar me Monika Kryemadhin, por vetëm bashkëpunim për rrëzimin e Ramës. Ndërsa sa i takon procesit zgjedhor të 30 qershorit, Basha nuk e përmendi fare, duke lënë të nënkuptohet se është pajtuar me rezultatin dhe ka pranuar kryebashkiakët e rinj në 61 bashkitë e vendit. 30 qershori ishte një nga kauzat kryesore që opozita të vazhdonte aksionin e saj kundër qeverisë, por duket se PD është dorëzuar përball kësaj kauze, duke lënë në baltë LSI. Po ashtu, burimet i bënë të ditur gazetës se kreu demokrat Lulzim Basha ka kërkuar nga krerët e degëve që të bëjnë sa më shumë anëtarësime të reja dhe të bëjnë pjesë të tyre të gjithë të zhgënjyerit nga partitë e tjera./Elisjeda KIKO
