Ftesa e kryeministrit Edi Rama ndaj kryetarit të Partisë Demokratike, Lulzim Basha për t’i dhënë fund mosmarrëveshjeve kanë alarmuar ish-kryeministrin Sali Berisha, njerëz pranë tij dhe Lëvizjen Socialiste për Integrim. Në çdo dalje publike kryeministri Rama i ka shtrirë dorën e bashkëpunimit kryedemokratit Basha, duke i kërkuar që të lënë pas mëritë dhe sulmet politike, në një kohë kur Shqipëria është në një situatë të vështirë për shkak të tërmetit të 26 nëntorit që la pas një tragjedi të madhe.
Por këto flirte mes Ramës dhe Bashës kanë shkaktuar shumë zemëratë, teksa gazeta mësoi se ish-kryeministri Berisha ka nisur presionet ndaj liderit demokrat, duke i kërkuar që të rrijë larg shefit të qeverisë. Mësohet se Berisha është shprehur skeptik për këto oferta të kreut të mazhorancës në adresë të kreut të opozitës dhe në këto kushte ka kundërshtuar një bashkëpunim mes dy liderëve, qoftë edhe sa i takon situatës së tërmetit.
Sipas informacioneve, Berisha ka kërkuar nga Basha që të mos ulet në tryezën e bisedimeve me Ramën, me pretendimin se ky i fundit mund ta fusë në “kurth” dhe t’i mbushë mendjen duke e çuar në një marrëveshje të dytë si ajo e 17 majit të vitit 2017, e cila rezultoi fatale për Berishën, pasi kreu i PD i “preu” duart ish-kryeministrit nga ndikimi mbi partinë. Po ashtu, të njëjtët burime theksuan se krah Berishës janë rreshtuar edhe ish-deputetët, të cilët njihen si njerëz të afërt me ish-kryeministrin, duke kërkuar nga Basha që të injorojë çdo ofertë dhe bashkëpunim me Ramën.
Berisha kundër vendimit për të mos sulmuar qeverinë
Në të njëjtën kohë gazeta ka mësuar se ish-kryeministri Sali Berisha, njerëz pranë tij dhe Lëvizja Socialiste për Integrim kanë dalë kundër vendimit të kreut të Partisë Demokratike, Lulzim Basha për të mos sulmuar qeverinë. Kryedemokrati Basha urdhëroi pak ditë më parë strukturat e PD të ndalin sulmet ndaj qeverisë, ndërsa iu ka kërkuar të zbresin në terren dhe të mbajnë kontakte me qytetarët e prekur nga tërmeti për të evidentuar nevojat e tyre.
Por ky vendim ka ngjallur zemëratë tek Berisha dhe ish-deputetët demokratë që njihen si besnikë të tij, të cilët i kanë kërkuar Bashës që të rishikojë këtë vendim, duke ia bërë të qartë se ata nuk i binden një urdhri të kësaj natyre. Dhe duket se kështu ka ndodhur, pasi nga dita që Basha nxori këtë vendim e deri më sot, Berisha dhe ish-deputetët e PD kanë vijuar me sulmet ndaj qeverisë, duke e përdorur tragjedinë për të bërë politikë. Ndërkohë, mes ish-deputetëve që kanë thyer urdhrin e Bashës, duke sulmuar qeverinë janë Albana Vokshi, Edi Paloka, Genc Pollo, Jorida Tabaku si dhe ish-deputetë të LSI.
LSI dhe Berisha frikë për një pakt të dytë
Por përveç ish-kryeministrit Sali Berisha, i cili ka nisur një ofensivë ndaj Bashës, mësohet se të njëjtën linjë ndaj kryedemokratit po mban edhe Lëvizja Socialiste për Integrim. Kjo e fundit i frikësohet një marrëveshje të dytë Rama-Basha si ajo e majit të dy viteve më parë, e cila rezultoi fatale për partinë e Kryemadhit. Kështu që, në kushtet kur këto komunikimet e të ditëve të fundit kanë nxjerrë në pah dashurinë mes Ramës dhe Bashës, mësohet se LSI dhe ish-deputetë të kësaj partie kanë nisur presionet ndaj liderit demokrat, duke i kërkuar që të rrijë sa më larg Ramës. Madje, të njëjtët burime theksuan se meraku më i madh i Lëvizjes Socialiste për Integrim është marrëveshja mes socialistëve dhe demokratëve pa bekimin e LSI dhe partive të tjera, sidomos sa i takon reformës zgjedhore, çka do ta përkeqësonte akoma më shumë ekzistencën e partisë së Kryemadhit në sferën politike. Ndërkohë, presionet ndaj kryetarit të Partisë Demokratike, Lulzim Basha janë rritur edhe nga media pranë Lëvizjes Socialiste për Integrim, sidomos ato pranë presidentit Ilir Meta.
