Nga Alfred Peza
I pari ishte Presidenti i Republikës që u duk i paqartë në qasjen e tij publike, rreth plan-veprimit dhe zbatimit të masave të jashtëzakonshme të qeverisë së Kryeministrit Edi Rama, për pandeminë e koronavirusit. Ndaj nxitoi që të ngrinte Task Forcën e tij. Por, shumë shpejt u kontaktua, u takua, u sqarua nga afër dhe mori garancitë e duhura se sistemi shëndetësor i vendit jep garancitë e duhura që kjo situate, do të menaxhohet në mënyrën e duhur.
Pas Ilir Metës, paqartësia sa vinte dhe shtohej në radhët e opozitës shqiptare. Ndaj edhe Lulzim Basha ngriti Task Forcën e tij, në lidhje me situatën. Ngaqë Kryetari i PD ka treguar një afeksion të admirueshëm për shifrat, shpallte njëherë një plan me 2, pastaj me 3, e më pas me 5 pika. Për ta mbyllur me planin prej 8 pikash të PD, që sipas qeveria e Kryeministrit Edi Rama, duhej ta zbatonte pikë e me presje në të ardhmen.
Me kalimin e ditëve, edhe Lulzim Basha nisi të kuptonte se i gjithë sistemi shëndetësor shqiptar dhe strukturat e tjera ndihmëse e mbështetëse qeveritare e shtetërore për përballimin e situatës së luftës kundër Covid-19 kanë edhe vullnetin politik, edhe kapacitetin teknik, por mbi të gjitha edhe burimet e duhura njerëzore, për ta përballuar atë.
Pas Presidentit francez Macron, ishte Presidenti i SHBA Donald Trump dhe Kryeministri Britanik Boris Johnson që deklaruan orët e fundit se “jemi në luftë”. Të mbështetur të gjithë pas kësaj, edhe nga deklarata e fortë e Kancelares gjermane Angela Merkel, e cila tha se që pas Luftës II Botërore, e gjithë bota nuk ka patur një sfidë të ngjashme për të përballuar, si kjo aktualja.
Qartësimi dhe ndërgjegjësimi çdo ditë e më tepër i të gjithëve për sfidën e paprecedentë në të cilën ndodhen shqiptarët dhe njerëzimi, ka bërë që të nisin me sa duket të reflektojnë edhe aktorët e faktorët opozitarë në Shqipëri. Ndaj pas Ilir Metës, radha ka qenë e Lulzim Bashës, që të bëjë një deklaratë që e dëshmon këtë qasje të re.
Kryetari i PD deklaroi sëfundi se “ftesa ime për qeverinë është të bëjë detyrat. U hap tenderi sot, e përshëndes. Nuk dua ta sulmoj, pavarësisht se me një javë vonesë. Më mirë vonë se kurrë, siç u njoftua në 24 orët e fundit, përmes tenderit që u hap për pajisjet respiratore. Uroj dhe shpresoj që sa më shpejt këto pajisje të vijnë në Shqipëri”,- tha Basha.
Në këtë mënyrë lideri i opozitës i ka dhënë për herë të parë mbështetje publike kreut të qeverisë në përpjekjet për të përballuar me sa më pak kosto njerëzore situatën në vend, në një kohë kur qendra e pandemisë globale, është zhvendosur nga Kina në Europë. E Italia fqinje, është aktualisht vendi që po vuan pasojat më të rënda, të goditjes nga virusi.
Dy faktorët kryesorë opozitarë në vend, sapo na kanë dëshmuar se e kanë kuptuar më në fund, se nuk mund të bëhet politikë, me koronavirusin që po rrezikon jetën e shqiptarëve. E për rrjedhojë, se nuk mund të dëmtohet politikisht Edi Rama përmes instrumentalizimit të situates dhe se përmes saj, nuk mund të fitohet as kredo elektorale për zgjedhjet e ardhshme. Sepse përpara koronavirusit, jemi të gjithë të barabartë. Kur je në luftë, të gjithë duhet të jemi përballë armikut, e jo përballë njëri- tjetrit.
Historia e këtyre 30 vjetëve pluralizëm, por edhe e këtyre 6-7 viteve të fundit, ka treguar se në pushtet nuk mund të vihet dot as me ngujime nëpër çadra, as duke djegur mandatet e deputetëve, as përmes “revolucionit të molotovëve”, as duke bojkotuar zgjedhjet dhe as duke shfrytëzuar momente si ky ku ndodhemi, përballë rrezikut real të jetëve njerëzore.
Opozita dhe liderët e tyre, humbën më shumë se një javë që të orientoheshin, derisa të vinin tek kjo pikë ku ndodhen sot. Ka ngushëllim kur mendon; “më mirë vonë se kurrë”,- siç tha vetë edhe Lulzim Basha sot. Më e rëndësishmja nga të gjitha këto, është fakti se më në fund opozita shqiptare e kuptoi, se në pushtet nuk mund të vihet, as nëpërmjet koronavirusit!
