Ditën e enjte, kryedemokrati Lulzim Basha organizoi një takim me qytetarët e Kavajës ku u mblodhën rreth 150 vetë çka është në kundërshtim me rregullat e Komitetit Teknik te Ekspertëve për korona virusin.
Ditën e djeshme kreu i Partisë Demokratike u gjobit me 5 milionë lekë teksa 20 vetë të tjerë mes tyre edhe ish-kryebashkiaku i Kavajës, Isa Sakja, u proceduan penalisht si organizatorë të tubimit. Teksa në vendin tonë infektimet kanë arritur shifra të larta dhe përditë ka viktima, Basha nuk është ndalur për të mbledhur qindra njerëz në sheshin e Kavajës.
Për këtë gjest reagoi edhe Policia e Shtetit, e cila u shpreh se nuk do të kishte tolerim ndaj asnjë partie politike që thyen rregullat kryesore që Komiteti Teknik i Ekspertëve ka vendosur dhe ajo veproi duke vendosur gjobën.
Por mesa duket marrja e gjobës nuk ka ndikuar aspak te vendimet e tij. Ditën e djeshme Basha ishte i pranishëm në qytetin e Durrësit ku organizoi një takim me qytetarët dhe bizneset. Përsëri ka patur qindra persona të grumbulluar aty që së bashku me kryedemokratin nuk kanë respektuar masat e distancimit social por kanë vazhduar përshëndetjet me njëri tjetrin normalisht.
Muajin e kaluar ishte ish-deputeti i LSI, Endrit Braimllari i cili u gjobit me 5 milionë pasi organizoi një aktivitet politik në Maliq në kundërshti me rregullat e covid. Edhe ministri i Turizmit Blendi Klosi u gjobit pasi organizoi një takim elektoral, duke grumbulluar dhjetëra persona dhe duke u shndërruar një rrezik për përhapjen e koronavirusit.
Gjobë ka pasur edhe për “Shoqatën Durrësi”, ku në aktivitetin e organizuar prej saj kishte qenë i pranishëm edhe presidenti Ilir Meta. Po ashtu dhe kryetarja e LSI, Monika Kryemadhi është gjobitur 2 herë deri tani për shkelje rregullash, debate me policët dhe mungesë të distancimit.
