Prokuroria e Posaçme Antikorrupsion këtë javë do të marrë jetë. Pas gati 3 vitesh zvarritje, përplasje dhe akuzash, pritet të niset një frymë e re në luftën kundër krimit të organizuar dhe korrupsionit. KLP sot do të dëgjojë kandidatët për postin e kreut të SPAK dhe pritet që brenda javës të bëhet përzgjedhja e kryeprokurorit. Nesër do të mbahet ceremonia e betimit dhe menjëherë do të nisë transferimi i dosjeve.
Por gazeta ka mësuar se mes shumë çështjeve që do të kalojnë te SPAK ka dhe dosje sekrete. Prokuroritë janë duke hetuar organizata kriminale dhe zyrtarë të korruptuar pa dijeninë e këtyre të fundit. Pikërisht këto hetime sekrete janë duke mbajtur në ankth bosët e krimit dhe politikën.
Kreu i SPAK
Një rol të rëndësishëm në luftën ndaj të korruptuarve do të ketë kreu i SPAK. Dje Këshilli i Lartë i Prokurorisë njoftoi se kandidatët Altin Dumani, Arben Kraja dhe Edvin Kondilli do të intervistohen sot nga anëtarët e KLP dhe intervista do të ketë të njëjtin format si të intervistimit të drejtuesit të Prokurorisë së Përgjithshëm. Intervistat e kandidatëve do të jenë transparente, më praninë e medias në sallë. “Këshilli i Lartë i Prokurorisë, në vijim të procesit të vlerësimit të kandidatëve për Drejtues të Prokurorisë së Posaçme kundër Korrupsionit dhe Krimit të Organizuar.
(SPAK), njofton se në datën 18.12.2019, në Sallën e mbledhjeve, Këshilli i Lartë Gjyqësor, Blvd. “Zogu i I”,do të zhvillohen intervistat me të tre kandidatët në garë. Intervistat me kandidatët do të regjistrohen me audio dhe video dhe do të zgjasë 30-45 minuta për secilin kandidat. Orari i zhvillimit të intervistave do të jetë si më poshtë: 1. Altin Dumani 09:30; 2. Arben Kraja; 10:15 3. Edvin Kondili 11:00. Këshilli kërkon nga kandidatët të marrin masa për t’u paraqitur pranë Këshillit të Lartë të Prokurorisë në datën dhe orën e njoftuar. Kandidatët do të njoftohen nominalisht dhe në adresën e postës elektronike që ata kanë deklaruar në momentin e aplikimit”, thuhet në njoftimin zyrtar të Këshillit të Lartë të Prokurorisë.
Ja karriera e kandidatëve
Por, kush janë Altin Dumani, Arben Kraja dhe Edvin Kondilli? Prokurori Altin Dumani është renditur i pari në listën e Këshillit të Lartë të Prokurorisë për të qenë pjesë e SPAK. Ai kaloi me sukses vetingun në shkallën e parë dhe nuk u ankimua në Kolegjin e Posaçëm të Apelimit. I hetuar për të tre kriteret e rivlerësimit, Dumani doli i pastër si tek pasuria, figura dhe aftësitë profesionale. Altin Dumani është një nga prokurorët që ka hetuar dosjen e “21 Janarit”, çështje të cilën e apeloi në Gjykatën e Lartë.
Prokurori i dytë, Arben Kraja është kandidati i parë që aplikoi për kryeprokurorin e Prokurorisë së Posaçme. Ai kaloi me sukses nga Komisioni i Pavarur i Kualifikimit në dhjetor të 2018. Prokurori Arben Kraja ka hetuar dosjen hetimore për abuzimet me fondet e rrugës së Kombit, ku u hetua edhe kryetari i Partisë Demokratike Lulzim Basha. Më tej.
Kandidati i tretë për kryeprokurorin e SPAK kaloi me sukses në procesin në vetingut. Bëhet fjalë për Edvin Kondillin, i cili ka hetuar disa dosje të rëndësishme, si 613 kilogramë kokainë kapur në Maminas, çështje në të cilën është përfshirë Arbër Cakaj. /Ornela Çelpica
