Linda Rama, gruaja e kryeministrit Edi Rama, ka qenë anëtare e Bordit të Bankës Amerikane të Investimeve deri vitin e kaluar. Ajo ka qenë anëtare në Bordin drejtues deri më 20 dhjetor të vitit të kaluar, në cilësinë e ekspertes në fushën e makro-ekonomisë.
Ajo thjesht ka konsumuar mandatin e saj si anëtare bordi. Sot, pas debatit në Kuvend, pasi Berisha u shformua në fytyrë nga debati me Ramën, që i kujtoi pamundësinë për të kaluar oqeanin, portalet afër Berishës hodhën në treg lajmin se Linda Rama ka dhënë dorëheqjen nga Bordi drejtues i Bankës Amerikane të Investimeve.
Bordi i Bankës ka 7 anëtarë. Vetëm një anëtar i Bordit është dhe aksioner, dhe ai është CEO i Bankës. Linda Rama, së bashku me katër personalitete të huaja, kanë qenë anëtarë të pavarur të Bordit. Rregullorja e Bankës kërkon që shumica e Bordit të jenë të pavarur nga Banka.
Anëtarët e Bordit japin mendime për punët e bankës, pyesin për vendimet e shkuara dhe ato të planifikuara në të ardhmen, aprovojnë struktura organizative pagash, planin e biznesit etj, dhe nuk kanë lidhje me pronësinë e Bankës, që e ka pronarin kryesor në Nju Jork.
E vërteta është se Berisha ndjehet i shqetësuar që bashkëshortja e kryeministrit nuk është më në Bord prej dhjetorit, pasi i duhej aty për të pasur një motiv për të shantazhuar investimin më të madh amerikan në Tiranë.
Dhe këtë po përpiqet ta paraqesë si një triumf të tij ndaj kësaj sipërmarrje amerikane. Edhe mund të ngushëllohet me këtë gjë, por nuk është se rregullon ndonjë gjë nga punët e veta. Sidomos tani që e di mirë si i ka./TemA
