Sali Berisha ka dhënë sërish ditën e djeshme sinjale alarmi se ka marrë informacione se punë javësh SPAK do të trokasë tek familjarët e tij, duke i çuar para drejtësisë për aferat korruptive dhe kriminale ku dyshohet se janë përfshirë. Prej disa muajsh, Berisha i shpallur “non-grata” nga Lodra dhe Uashingtoni ka sulmuar më fort se kurrë Prokurorinë e Posaçme, madje ka shkuar deri në ekstrem, duke mbrojtur hapur korrupsionin e lartë që po godet SPAK dhe arrestimet që po përgatit.
Dosjet e tij janë “mal” në SPAK, por drejt mbylljes janë dy çështje, ajo e “Gërdecit” dhe privatizimi i ish-klubit “Partizani”, që fundosin djalin e tij, Shkëlzen Berisha dhe dhëndrin Jamarbër Malltezi. Në kufijtë e panikut, Berisha ka urdhëruar lakenjtë e tij dje që të shkaktojnë kaos brenda sallës së Parlamentit, ndërsa ka kërcënuar hapur prokurorët e Strukturës së Posaçme Kundër Krimit të Organizuar dhe Korrupsionit. Dje Kuvendi u kthye në shesh beteje, ku deputetë të “Foltores” bllokuan karriget e ministrave, çka detyroi drejtuesen e Parlamentit të mbyllte seancën plenare. Por sikur të mos mjaftonte kjo, Berisha shfrytëzoi edhe foltoren e zaptuar të Kuvendit për të shantazhura prokurorët e Posaçëm, ndërsa theksoi se Prokuroria e Posaçme është e kontrolluar nga Edi Rama.
“Kurrë ndonjëherë drejtësia nuk ka qenë më e kontrolluar se sot që nga koha e Enver Hoxhës. Nuk ka kryeministër në botë që do qëndronte kryeministër, në rast se një seri ministrash i dalin të implikuar në vjedhjen e qindra milionë eurove. Ai qëndron se me SKAP-in e partisë, dënon atë që do dhe amniston atë që do. Dhe u paraqitet shqiptarëve si një njeri i pastër, në një kohë kur ai është më i korruptuari. Në një kohë kur ai dhe familja e tij janë shushunja që me dhjetëra e qindra tendera, plaçkisin pasuritë tuaja, paratë tuaja, fondet tuaja”, deklaroi ai. Por akuzat që artikulon Berisha nuk kanë sens dhe tregojnë se ai është frikësuar nga tringëllima e prangave për Zenin dhe Jamarbër Malltezin, pasi SPAK është nën patronazh nga amerikanët dhe të gjitha goditjet në nivele të larta janë në kampin e majtë.
Ndërkohë dje në mbrëmje kreu i “Foltores”, Sali Berisha ka folur në një media për atë që ai e cilëson “beteja e re” kundër qeverisë, e nisur ditën djeshme me aksionin në Kuvend, duke bllokuar foltoren dhe moslejimin e zhvillimit normal të seancës. Berisha foli për mekanizmat që do të ndiqen për të arritur qëllimin, ndërsa shtoi se tashmë nuk ka mbetur asnjë rrugë tjetër. Sipas tij janë në situatën, ose të luftojnë në Parlament, ose ta bojkotojnë atë. Zgjidhjen e fundit Berisha thotë se nuk e konsiderojnë.
Krisen raportet Berisha-Meta
Por seanca e djeshme plenare, e cila u përfshi në kaos ka konfirmuar edhe zërat se ka krisje mes Ilir Metës dhe Sali Berishës. Që pas disfatës në zgjedhjet vendore raportet e tyre kanë pasur ulje dhe ngritje, por aleanca e fundit e Berishës me Gazment Bardhin ka bërë që Ilir Meta të mendojë distancimin. Pak ditë më parë ishte vetë Meta që dha sinjalin se ai mund të bëjë aleancë vetëm me Berishën dhe deputetët pranë tij, por jo me Bardhin. Po ashtu vuri në dyshim dhe aleancën për zgjedhjet e 2025. Mirëpo gjithçka u vendos dje, ku Berisha nisi një revoltë në Kuvend, duke bllokuar punimet e seancës plenare.
Vendimi u mor në një mbledhje të martën, por që mësohet se nuk është mbështetur nga Partia e Lirisë. Deputetët e Partisë së Lirisë nuk e kanë mbështetur këtë aksion, pasi në momentin që Berisha me Bardhin dhe ata që u shkojnë pas hynë në sallë dhe bllokuan vendet ku rrinë ministrat, 3 deputetët e PL nuk ishin fare aty. Po ashtu edhe aleatët e tjerë që kanë qenë prezentë në sallë, nuk janë bashkuar me grupin që krijonte kaos. Vetë Meta në disa dalje kohët e fundit e ka theksuar se kërkon një linjë tjetër reagimi. Ai ka lënë të kuptohet se nuk i mbështet protestat dhe opozita duhet të luftojë në Kuvend me argumente dhe nisma.
Kështu që sinjalet janë se dy aleatët po kalojnë një situatë delikate dhe krizë. Megjithatë mbetet të shihet se si do të përfundojë aleanca, por duket qartë se afrimi i Bardhit ka trazuar ujërat.
