Ish-kreu i Shërbimit Informativ Shtetëror, Fatos Klosi shprehet i gatshëm për të dëshmuar në gjyqin e Izet Haxhisë. Dje u mbajt seanca e radhës në Gjykatën e Tiranës ndaj Izet Haxhisë, i cili akuzohet për v.rasjen e Azem Hajdarit.
Por edhe pse avokati Idajet Beqiri e kishte lënë ish-kreun e SHISH, Fatos Klosi jashtë listës së dëshmitarëve, Izet Haxhia ka kërkuar dje në gjykatë që ai të thirret si dëshmitar.
Sipas palës mbrojtëse, Klosi ka informacion mbi ngjarjen dhe dëshmia e tij ka shumë vlerë. Gazeta kontaktoi me zotin Klosi, i cili gjatë reagimit e përshëndeti dhe mirëpriti lajmin që do të shkojë për të dëshmuar.
I qartë dhe i prerë si gjithmonë, ish-kreu i SHISH theksoi se në gjyq do të rrëfejë gjithçka di për v.rasjen e Hajdarit, ndërsa shtoi se SHIK ka të dokumentuar ngjarjen.
“Sigurisht që jam i gatshëm që të dëshmoj në çdo kohë nëse do të më kërkohet të dëshmoj për dosjen “Hajdari” dhe nga kjo pikëpamje, patjetër do të shkoj të dëshmoj tek gjyqi i Izet Haxhisë.
Ndërkohë unë e kam thënë për gazetën tuaj dhe për media të tjera që ne Shërbimi Informativ Shtetëror gjatë kohës kur ky institucion drejtohen nga unë, ja kemi dhënë ato që dinim me shkresa policës, prokurorisë të gjitha çka dinin ne në atë kohë për v.rasjen e ish-deputetit Azem Hajdari.
Ja kemi dhënë me shkresa dhe raporte që kanë qenë shumë. Kështu që, unë jam i gatshëm të shkoj të dëshmoj dhe t’i vë në dispozicion ato që di dhe janë shkresa pafund.
Pse dhe çfarë ka ndodhur asokohe, kështu që nga kjo pikëpamje unë jam i gatshëm që t’i vë në dispozicion në shërbim të institucioneve të drejtësisë. Pra, nuk e kam kompleks të shkoj të dëshmoj në gjyq”, deklaroi ai për gazetën “SOT”.
Berisha duhet të shqetësohet
Por ndërsa mirëpret ftesën për të dëshmuar në gjyqin ndaj Izet Haxhisë, ish-kreu i Shërbimit Informativ Shtetëror, Fatos Klosi thumboi në distancë ish-kryeministrin Sali Berisha.
Ky i fundit është thirrur më herët për të dëshmuar në gjyqin ndaj v.rasjes së ish-deputetit Azem Hajdari, por ka refuzuar të shkojë.
Ndërkohë që me rihapjen e gjyqit ndaj Izet Haxhisë, ish-bodyguardi i Berishës, ka kërkuar që të thirret si dëshmitar edhe ish-lideri demokrat.
Mirëpo, për zotin Fatos Klosi kjo lëvizje e Haxhisë është një kambanë alarmi për Berishën, pasi sipas tij, i vetmi që duhet të shqetësohet për rihapjen e gjyqit është ish-kryeministri.
“Po ripërsëris ato që kam thënë për gazetën tuaj, që Sali Berisha gjatë këtyre 22 viteve ka thënë shumë gjëra të vërteta dhe të pavërteta pa fund për çështjen “Hajdari”.
Por mendoj se tani ka ardhur koha që Berisha të thotë çfarë di dhe çfarë nuk di, pasi ai ka bërë shumë deklarata kontradiktore.
Berisha ka gisht në v.rasjen e ish-deputetit Azem Hajdari. Kështu që fakti që gjykata e rihapi tani dosjen “Haxhia” e ka vënë Berishën në pozita të vështira tani dhe nuk e do rihapjen e dosjes “Haxhia” apo edhe “Hajdari”.
Berisha ka gënjyer shumë dhe i ka hyrë frika në palcë tani. Dhe bën mirë që të shqetësohet. Berisha e shfrytëzoi v.rasjen e Hajdarit për favorin e tij dhe e përdori politikisht.
Kështu që duke qenë se mes emrave që janë thirrur për dëshmitarë në gjyqin e Izet Haxhisë është edhe Sali Berisha, ky është një lajm i mirë”, nënvizoi ish-kreu i SHISH, Fatos Klosi për gazetën “SOT”.
