Presidenca është kthyer në një çerdhe për zyrtarët e inkriminuar dhe të afërmit e kryetares së Lëvizjes Socialiste për Integrim, Monika Kryemadhi. Edhe pse kjo e fundit ka refuzuar titullin e Zonjës së Parë, njerëzit e saj janë pjesë e zyrës së kreut të shtetit. Presidenca ka përditësuar të dhënat për zyrtarët dhe këshilltarët që punojnë në krah të Presidentit të Republikës, Ilir Meta.
Nga një vëzhgim i thjeshtë në faqen zyrtare të Presidencës, bie në sy se tek kabineti i kreut të shtetit është edhe emri i Majlind Lazimit i cfili ishte Drejtori i Postës Shqiptare instuticion që punësonte militantët e LSI dhe ishte kthyer në një SHPK e familjes Meta. Ai mban postin e Këshilltarit Ekonomik të Metës, por nga ana tjetër ka edhe lidhje familjare me Monika Kryemadhin. Thënë më drejt, Lazimi është djali i tezes së kryetares së LSI. Pra, edhe pse Kryemadhi nuk e ka pranuar titullin e Zonjës së Parë, duket se e shfrytëzon faktin që bashkëshorti i saj është President i vendit, duke punësuar kushërinjtë e saj.
Mesa duket, ata që ngelën pa punë pasi LSI kaloi në opozitë, tani po strehohen në Presidencë. Por si të mos mjaftonte kjo, pjesë e stafit të Presidencës janë bërë edhe njerëz me precedentë penalë. Për Marrëdhëniet Ndërkombëtare Meta merr këshilla nga Genci Muçaj. Para se të merrte detyrën e këshilltarit në Presidencë, Genci Muçaj ka qenë ambasador i Shqipërisë në Turqi dhe drejtor i Shërbimeve dhe Marrëdhënieve Shumëpalëshe pranë Kuvendit.
Por duket se e shkuara e tij nuk është fort e mirë. Genci Muçaj u dërgua në gjyq nga Prokuroria e Tiranës në vitin 2016 sepse kishte fshehur të dhënat në formularin e dekriminalizimit. Ai kishte fshehur një dënim të Gjykatës së Tiranës në vitin 2008 dhe për këtë u dënua me gjobë për falsifikim të dokumenteve.
