10 kabina dhe 2 ndërtesa të tjera, në zemër të Thethit, perlës së alpeve shqiptare, janë ndërtuar pa asnjë leje nga autoritet shqiptare.
Ngjitur me kishën shekullore, simbol i fshatit destinacion i mijëra turistëve në çdo stinë, ndërtimi është makabritet që Kryeministri Rama e quan një masakër të mirëfilltë të realizuar nga një individ, i cili rezulton i paarritshëm nga krahu i ligjit.
Për skandalin e ndërtimit pa leje, Kryeministri Rama denoncoi vendimin e prokurores Elsa Gjeli në Shkodër, e cila nuk gjeti arsye për të nisur hetimet ndaj Kodrës.
‘Si ka mundësi, si është e mundur që pasi, insektoriati përkatës dhe policia konstatojnë një ndërhyrje të tillë mu në zemër të asaj mrekullie të maleve shqiptare, dhe përcjellin rastin në prokurori, prokuroria nuk shpall në kërkim të menjëhershëm personin, por mosfillimin e çështjes”, tha ai.
Për këtë vendim të prokurores, Rama thotë se i ka kërkuar ministrisë së Drejtësisë t’i përcjellë rastin KLP-së, dhe kjo e fundit të vendos nëse prokurorja Gjeli e meriton të vijojë të qëndrojë në detyrë apo jo.
‘Ka lënë në baltë shtetin dhe ka lënë në baltë qytetarët e republikës, ka lënë në baltë të gjithë ato struktura që përpiqen të ruajnë kufijtë e ligjit dhe e cila është e padenjë për të qenë e paguar nga taksapaguasit si prokurore dhe kam kërkuar që çështja e saj t’i përcillet Këshillit të Lartë të Prokurorisë, i cili duhet të shikojë dëmin e madh që i ka sjellë mosfillimi i çështjes penale republikës dhe interesit publik dhe të gjykojë nëse zonja Gjeli është apo jo e denjë për tu paguar ende nga taksat e shqiptarëve si prokurore’, tha ai.
Nuk vonoi shumë dhe fadromat mbërritën në Theth për të prishur kabinat turistike pa leje.
‘Kjo është fusha e mrekullueshme e Thethit, ku një kriminel, që as nuk ka kurajon të shfaqet ndërkohë që IKMT po zbaton ligjin, ka hedhur betonin e dynjasë për të ndërtuar “fshatin e tij turistik” pa asnjë leje’, tha ai.
Akuzat e Kryeministrit, prokuroria e Shkodrës, i quan të patolerueshme dhe ndërhyrje në një pushtet tjetër, ndërsa për vendimin e Elsa Gjelit thotë se ai është bazuar në ligj.
Sipas organit të akuzës këtu nuk kemi të bëjmë me një ndërtim që kërkonte leje, ndërsa vetë policia i ka referuar si kontejnerë të përkohshëm pa themele, të vendosura jo mbi bazamente betoni por në rrasa guri të prera. Në këto kushte duhet të kishin vepruar institucionet që kanë në përgjegjësi menaxhimin e territorit thotë prokuroria.
‘Në rastin konkret, nga vlerësimi i plotë i fakteve dhe akteve procedurale, u konstatua se faktet e referuar nga policia e shtetit nuk përbëjnë ndërtim të paligjshëm në kuptim të nenit 199/a të Kodit Penal, për arsyen se: Strukturat e konstatuara dhe që janë referuar nga policia kanë qënë kontenjerë të përkohshëm pa themele, të vendosura mbi pllaka guri, dhe si të tilla nuk përmbushin kriteret për të konsideruar objekt ndërtimi sipas standardeve të përcaktuara në ligjin nr. 107/2014 “Për planifikimin dhe zhvillimin e territorit”, i ndryshuar. Vetë Policia, në procesverbalin e këqyrjes së vendit të ngjarjes është shprehur se, kontenjerët nuk janë vendosur mbi bazamente betoni, por kanë qënë të vendosura mbi rrasa guri të prera’, thuhet në reagim.
Tashmë ndërtimi që shkatërronte pamjen e qendrës së Thethit është i rrafshuar, ndërsa Kryeministri Rama premton se të gjitha kabinat e “fshatit turistik” do t’i marrë shteti.
“Të gjitha kabinat e “fshatit turistik” të kriminelit që plagosi Thethin do i marrë shteti dhe skuadra e Bashkisë Shkodër nuk do të largohet nga Thethi pa e shëruar zemrën e qytezës magjike”, tha ai.
